Pasaitarrek sortutako errefusa aztertu da
Edukiontzi grisera botatako hondakinen ia %74 birziklagarriak ziren. Hondakin horiek gaikako bilketarako edo garbiguneetarako prestatutako edukiontzietan utzi beharren, errefusera bota ziren.
Iazko uztailean Gipuzkoako Hondakinen Kontsorzioak Pasaian sortutako errefusa jasotzen duen kamioiaren karakterizazio bat egin zuen, edukiontzi grisera botatako materia aztertzeko. Azterketa horren arabera, edukiontzi grisera botatako hondakinen ia %74 birziklagarriak zirela jakinarazi du Pasaiako Udalak. Hau da, hondakin horiek gaikako bilketarako edo garbiguneetarako prestatutako edukiontzietan utzi beharrekoak ziren.
Azterketa horretan aurkitutako hondakinen ia %24 biohondakinak zirela adierazi du udalak, eta materia organiko horiek edukiontzi marroira bota behar dira. Hondakinen %26, gainera, edukiontzi zurira bota beharreko oihalak eta ehunak ziren. Horrez gain, honako materia birziklagarria topatu zen: ontzi arinak, papera eta kartoia, zura, beira edota pilak. Elementu horiek guztiak gaikako bilketarako edukiontzietan edota garbiguneetan utz daitezkeela gogorarazi du udalak.
“Datu horiek latzak dira, eta berriz ere agerian uzten dute hobekuntzarako tarte handia dugula. Karakterizazioaren emaitza kontuan hartuta, argi dago edukiontzi grisean uzten diren hondakin gehienak birziklagarriak direla eta askoz gehiago egin daitekeela”, esan du Iraitz Pazos Zerbitzu eta Ingurumen zinegotziak.
2024an ia 3.000 tona errefus sortu zen Pasaian, eta kudeaketa gastua 625.000 eurokoa izan zen, hau da, 215 euro tona bakoitzeko. Pazos: “Edukiontzi grisean biltzen den hondakin kopuruak esponentzialki gora egin du azken urteotan, eta horrek eragin zuzena izan du hondakinen tasaren igoeran. Horri gehitu behar zaio, Hondakinen Estatuko Lege berria ezartzearen ondorioz, udala behartuta dagoela sorreraren araberako ordainketa jasoko duen zerga bat ezartzera; hau da, zenbat eta hondakin gehiago, orduan eta kostu handiagoa kudeaketan, eta, beraz, tasa handiagoa herritarrentzat”.
Datuak onak izan arren, Pazosek adierazi du egoera hori iraultzeko garaiz daudela oraindik: “Gaikako bilketa tasak eragin zuzena du udalen hondakin kudeaketa gastuetan. Errefusaren sorrera zenbat eta handiagoa izan, orduan eta handiagoa da hondakinen kudeaketako gastua”.
Iazko birziklatzeko tasa %48koa izan zen Pasaian, eta errefusaren kudeaketaren kostua 625.000 eurokoa izan zen. Pasaiak Gipuzkoako Hiri Hondakinak Kudeatzeko Planak ezartzen duen %70a gainditu izan balu, kudeaketa kostuetan 350.000 euro aurreztuzko ziratekeela baietsi du udalak. “Edo, bestela esanda, errefusetik ateratako hondakin birziklagarri guztiak dagokien edukiontzian utzi izan bagenitu, Pasaiako hondakinen gaineko zerga %6 igoko zen, %15 igo beharrean”, esan du Pazosek.
Egoera horren aurrean, udalak “apustu sendoa” egin du pasaitarrak etxeko eta merkataritzako hondakinen kudeaketa egokian kontzientziatzeko eta hezteko. “Hondakinak kudeatzeko ordenantza berria onartu eta Etorkizuna birziklatzen kanpaina hedatu ondoren, udalak urrats sendoak egiten jarraituko du, herritarrekin lankidetzan gaikako bilketa tasa handituz joan dadin eta, beraz, kudeaketaren kostua murriztu dadin. Horrek, zalantzarik gabe, eragin positiboa izango du bai ingurumenean eta baita udalerriko familien ekonomian ere”, zehaztu du Pazosek.
