Euskaltegietako ikasleek Zaporeak elkartearen jarduna ezagutuko dute
'Zaporeak: Zer da eta zertan aritzen da?' tailerra emango dute elkarteko kideek hilaren 27tik apirilera bitarte.
Zaporeak Europara iristen diren errefuxiatuei janaria eskaintzen dien irabazi asmorik gabeko elkartea da. Donostian dute egoitza, baina Euskal Herri osoak ezagutzen du sozietatearen jarduna. Oraingoan, ordea, Errenteria – Orereta, Lezo, Oiartzun eta Pasaiako euskaltegietako ikasleek Zaporeak-en lana gertutik ezagutzeko aukera izango dute Zaporeak: zer da eta zertan aritzen da? tailerrari esker. Ondorioz, egoera zaurgarrian dauden pertsonei nola laguntzen dien jakingo dute.
Oarsoaldeko Euskara Batzordearen Mintzagun programaren barruan antolatu dituzte topaketa horiek, eta hilaren 27tik martxoaren 12ra egingo dituzte tailerrak eskualdeko zenbait euskaltegitan. Saio bakoitzak ordu eta erdi inguruko iraupena izango du, eta “euskara ikasten ari direnei gaurkotasuneko gaietara modu praktikoan eta ingurune guztiz euskaldunera hurbiltzeko” aukera emango die.
Hitzordu horien helburua argia da: testuinguru errealetan euskararen erabilera sustatzea eta edozein gai euskaraz jorratu daitekeela erakustea. Hortaz, hizlariarekiko elkarreraginaren bidez, ikasleek euren ulermena eta ahozko adierazpena indartuko dituzte gizartean eragin handia duen ekimen bat gertutik ezagutzen duten bitartean.
Tailerren egutegia
- Hilak 27: Txirrita AEK (Pasai Antxo). 10:00 – 11:30.
- Martxoak 4: Intxixu AEK (Oiartzun). 9:30 – 11:00.
- Martxoak 6: Oroitzene AEK (Lezo). 10:00 – 11:30.
- Martxoak 6: Xenpelar AEK (Errenteria – Orereta). 16:00 – 17:30.
- Martxoak 12: Pasaiako Udal Euskaltegia. 9:30 – 11:00.
- Apirila: Errenteriako Udal Euskaltegia.
