Euskaraldian murgiltzera deitu dute
Euskaraldiaren batzordeak agerraldia egin zuen atzo. Bigarren bilera egin du batzordeak, eta gogora ekarri oraindik ere izena eman dezaketela entitateek bat egiteko.
Euskaraldiaren herri batzordea Errenteria-Oreretan. Euskaraldiarekin buru-belarri, gonak bete lan ari dira Errenteria-Oreretan. Euskaraldiaren batzordeak atzo egin zuen bigarren bilera, eta testuinguru horretan deia egin ziten oraindik orain Euskaraldiarekin bat egin ez duten entitateei, euskararen aldeko ariketa sozial erraldoian murgil daitezen. Maiatzaren 15etik 25era izango da Euskaraldiaren laugarren ekitaldia, helburua hizkuntz ohituretan eragitea, euskararen alde jartzea balantza, horretarako, ariketa sozial masiboa eginda.
Aurtengoa harago joan eta “gelditzeko etorri” dela azaldu zuen Naroa Etxeberria Arruabarrena Euskaraldiaren koordinatzaileak, “euskaraz gehiago, gehiagorekin eta gehiagotan egiteko. Euskararen erabilera erdigunean jartzeko asmoz batu gara hamaika entitate, kide anitzez osatutako batzordea hamaika egiteko dituena, euskara txoko guztietara heltzeko. Elkar mugituz egingo dugu”. Puntu horretara helduta deia egin zien Etxeberriak herriko entitateei bat egin dezaten Euskaraldiarekin. izena emateko epea oraindik ere zabalik dela oroitarazi zien, eta guztien inplikazioaren beharra nabarmen jarri, “denok kabitzen gara Euskaraldian, abiapuntu ezberdinetatik eta bakoitzak ahal duena eginez, baina euskara urrun duten horiengana ere heltzeko apustuarekin”.
Hori horrela herri guztia mugitzea beharrezkoa dela esan zuen, “ariketa kolektiboa izatea eta entitateek ere badute zeresana eta zeregina”. Norbanakoen txanda, martxoaren 15ean helduko da; egun horretatik aurrera ahalko dute azken horiek izena eman betiko roletan, belarriprest eta ahobizi gisa, alegia”. Une honetan, beraz, entitateen unea da, eta hala, lantoki, elkarte, komertzio, batzorde edo dena delakoa euskararen erabilera aktibatzeko mugimenduan parte har dezaten eta entitate gisan Euskaraldian izena eman dezaten, “bakoitzak lanketa mota berera egokituz, oinarrizko lanketa egin edo bestelako pausoak ere eman nahi dituzten erabakiz”.
Norbanakoei prestatzeko deia, “martxoaren 15etik izango duzue belarriprest eta ahobiziek izena emateko txanda”.
