93 pertsona eta elkartek eskatu dute hitzordua energia bulegoan
2024an, aurreko urteekin alderatuta, hirukoiztu egin dira energia bulegoak artatu dituen kontsultak. 2023an 27 kontsulta izan ziren; 2024an, 93.
Ibon Mitxelena Fernandez, Ekonomia Sozialerako Zinegotzia eta Xabier Sesma Korta, Oarsoaldeako Jasangarritasun Teknikaria. Oarsoaldeko Energia Bulegoa lekualdatu zuten iaz herritarrei “zerbitzu gertuagokoa eta erosoagoa” eskaintze aldera. Ordutik, astelehenero, Mendiburu kaleko udal bulegoetan egoten da energian aditua den teknikari bat, eta oiartzuarrek elektrizitatearen eta gasaren inguruan dituzten zalantzak argitzeko, bertara joan behar da.
Udalaren arabera, energia kontsumo jasangarriago baten aldeko interesa eta konpromisoa erakutsi dute bizilagunek, eta, beraz, “Oarsoaldeko Energia Bulegoa herritarren beharrei erantzuteko tresna baliagarri bihurtu da”. Hots, gehitu dute hitzordu kopuruak gora egin duela.
2024an 93 herritar zein elkartek hartu zuten hitzordua; erabiltzaileen %59 emakumeak ziren. Kontsulten %96 partikularrek egin dituzte; %2 enpresek eta beste %2 elkarteek. 2023an 27 hitzordu izan zituzten. Zehazte aldera: kontsulten %68 energia fakturen azterketa eta optimizazioarekin zein tarifen inguruko aholkularitzarekin lotutakoak izan dira. Beste %21a, aldiz, energia berriztagarriei buruzkoak.
“Bulegoa tresna baliagarria izan da elektrizitate eta gasaren fakturak murrizteko. Lortutako aurrezpen ekonomikoaren estimazioak egin dituzte, eta argindarraren kasuan, hileko 22,53 euro aurrezten lagundu zaie artatutako oiartzuarrei. Gasaren kasuan, aldiz, 540 euro gutxiago ordaintzen lagundu da”, gehitu dute.
Bulegoak astelehenero ematen du zerbitzua Mendiburu kaleko 3. zenbakian, 9:00etatik 14:00etara eta 14:30etik 16:00etara.
