Etxebizitza Bulegoa Oiartzungo Udaletxera lekualdatu dute
Herritarrei bertatik bertara informazioa eman ahal izateko asmoz lekualdatu dute zerbitzuaren kokalekua. Orain, Oiartzungo Udaletxean dago.
Etxebizitza Bulegoaren informazio zerbitzua zein zerbitzuaren kudeaketa Oiartzungo Udalera lekualdatu dituzte “herritarrei bertatik bertara informazioa eman ahal izateko”.
Udalaren arabera, aldaketa horrekin herritarrentzako etxebizitza irisgarri eta duinarekin duen konpromisoa indartu eta informazioa eskuragarriago jarri dute, “izapideak erraztuz eta zerbitzua udalerriko bizilagunei hurbilduz”.
Etxebizitza Bulegoa 2016ko irailean jarri zuen martxan udalak Oarsoaldea Garapen Agentziarekin elkarlanean eta Eusko Jaurlaritzaren ASAP –Alokairu Segurua, Arrazoizko Prezioa– egitasmoaren bidez.
Bederatzi urte horietan zehar, Garapen Agentziaren bidez, 260 maizter eta 63 etxejabe igaro dira Etxebizitza Bulegotik.
Oiartzungo Etxebizitza Bulegoa etxeko jabeentzako eta maizterrentzako informazio eta bitartekaritza gune bat da, eta Alokabiderekin lotutako izapideak egiteko; laguntzak bideratzeko zein prozedurak kudeatzeko laguntza eskaintzen du.
Hala ere, informazio gehiago nahi duenarentzat helbide elektroniko bat eta 943 49 03 77 zenbakia ahalbidetu dituzte.
