Izapideak errazteko bi makina jarri ditu udalak
Administrazio elektronikoa errazteko hartu dute erabakia. Makinak Oiartzungo Udaletxean eta Arraguako Euskotren geltokian daude.
Herritarrek egin beharreko gestioen prozedurak errazte aldera, bizilagunek ohiko izapideak noiznahi egin ahal izateko bi makina eskuratu ditu Oiartzungo Udalak; udaletxean dago bat eta Arraguako Euskotreneko geltokian bestea. Gailu horien bidez, herritarrek biztanleen erroldako ziurtagiriak atera; ordainagirien kopiak eskuratu; zerga eta isunak ordaindu edota Landetxeko ikuskizunetarako sarrerak erosteko aukera izango dute egun osoan zehar.
Joana Mendiburu alkateak adierazi du izapideak “zain egon beharrik gabe eta bakoitzak nahiago duen tokian eta ordutegian egiteko” jarri dituztela bi makinak. Udalak, beraz, zerbitzu “eraginkorragoa eta erosoagoa” eskaini nahi du.
Mendiburuk, bestalde, nabarmendu du makinak “oso intuitiboak” direla eta ziurtagiriak lortu zein ordainketak egiteko nortasun agiria baino ez dela behar. Irakurgailuaren gainean nortasun agiria jarri eta egin nahi den izapidea aukeratu behar da.
Alabaina, azaldu dute eragiketa guztiak udalaren webgunean ere egin daitezkeela. Horretarako, ordea, BakQ edo ziurtagiri elektronikoa behar dira.
Era berean, udaletik jakinarazi dute udaberrirako herritarrei zuzeneko arreta eskaintzeko toki berria prest izatea espero dutela. Hots, nabarmendu dute bitartean lan ohiturak egokitzen hasteko “lehen mailako arreta ia guztia udaletxeko behe solairutik” bideratzen hasi direla udal bulego ezberdinetara joan beharrik gabe.
Haatik, esan dute espazio aldetik mugatua dela, eta horri aurre egiteko arretarako gune berria irekiko dutela “laster” udal eraikin nagusiaren ondoan. Uda aurretik ireki nahi dute gune hori.
