Paperak Galdu Gaberen lehenean, feminismoaz goxo
'Feminismoa Oarsoaldean, gaur' izenburupean eskualdeko mugimendu feministaren gaineko gogoeta jaso zuen Landetxek ostiralean.
Ostiraleko solasaldiaren une bat.Imanol Saiz Oiartzun Irratiaren eta OARSO BIDASOKO HITZAren elkarlanetik abiatutako Paperak Galdu Gabe mahai-inguru ziklotik lehena egin zen joan den ostiralean (hilaren 7an) Oiartzungo Landetxen. Martxoaren 8aren bezpera izanik, eskualdeko mugimendu feministaren gaineko gogoeta egin zuten Uxue Barrenetxea Bruño oiartzuarrak, Eba Ibañez Rozadilla lezoarrak, eta Laia Urretabizkaia Mitxelena oreretarrak. Sareetatik zuzenean eman zen mahai-ingurua, Oiartzun Irratiaren Instagram kontutik zehazki. Gainera, irratiak ere zabaldu zuen bere uhinetatik, zuzenean, solasaldia. Landetxen bertan hainbat izan ziren hizketaldiaz gozatu zuten herritarrak
Feminismoa Oarsoaldean, gaur izenburupean, hiru hizlariek euren esperientziatik eta bizipenetatik azaldu zituzten bizi diren herrietako mugimendu feministaren nondik norakoak. Egindakoak, lortutakoak, saretzea, egin beharrekoak, eta beste hainbat izan zituzten hizketagai. Betiere goxo eta irmo.
Ostiralekoa Martxoaren 8aren barruko ekitaldien barrukoa izan zen. Oiartzunen, eta eskualdean, asko izan ziren Emakumeen Nazioarteko Egunaren harira antolatutakoak. Mahai-inguru horrekin, bai Oiartzun Irratiak zein HITZAk borroka feministen sakontasunari aletxoa jartzeko asmoa izan dute.
Gainera, datozen egunetan, solasaldiaren bideo nahiz audioa zabalduko dituzte bi hedabideek. Jarraian, laburpen bideoa:
