Donibaneko JJ Otaegi parkea eraberritu du udalak
Haurrek jolaserako eta aisialdirako gune erakargarriago, modernoago eta seguruago bat izango dute hemendik aurrera. Hiru eremutan banatutako zazpi joko jarri dira.
Pasaiako Udalak Donibaneko JJ Otaegi parkea eraberritu du, haurrek jolaserako eta aisialdirako gune erakargarriago, modernoago eta seguruago bat izan dezaten. Jolasgunea berritzeko, lehenik eta behin egoera txarrean zeuden jolas elementuak eta zoladura kendu zituzten. Parkeko zenbait elementu zaharkituta zeuden, eta horien ordez kalitate handiagoko eta erabilera segururako egokitutako elementu berriak jarri dituzte. Horrez gain, zoru berria ere ezarri dute, haurrek erorketak izanez gero, segurtasun handiagoa izan dezaten.
JJ Otaegik itxura modernoagoa du orain, eta jolasa eta garapena uztartzea dira gune berriaren helburuak. Azpiegitura berrituak hiru gunetan banatutako zazpi jolas ditu, adin tarte ezberdinetako haurrei begirakoak: zabuak, txirristak, malgukiak, balantzin bat, etxetxo bat eta ontzi birakaria.
Jolasgunearen sarreran informazio panel bat jarri da. Bertan, eremuaren arauak, gomendioak eta informazio praktikoa topatuko dute erabiltzaileek. Jolas ekipamendu bakoitzean, gainera, gomendatutako erabilera adina zehaztu da.
Parkearen berrikuntza proiektuak 39.724, 10 euroko aurrekontua izan du. Obrak bukatu badituzte ere, apirilean beste hobekuntza batzuk egingo direla aurreratu du udalak, espazioa osatzeko. Zehazki, guneko barandak eta bankuak margotuko dira, Oarsoaldea Garapen Agentziaren Auzolan Margolaritza programaren bitartez.
