Garraio publikoaz hausnartu dute 'Gipuzkoa Nodal' jardunaldietan
Landetxen egin zuten hitzordua, eta mugikortasunean adituak eta erakunde publikoetako ordezkariak elkartu ziren saioan.
Euskal Herriko Unibertsitatea (EHU) eta RAZekin elkarlanean, Gipuzkoa Nodal jardunaldia antolatu du Oiartzungo Udalak garraio jasangarriagoa sustatze aldera. Etorkizuneko mugikortasunaz gogoeta egin eta garraio publikoa erdigunean jarriko duen eredua lantzen hasteko lehen saioa egin zuten otsailean, Landetxen. Hitzorduan zenbait erakundetako ordezkari eta adituak elkartu ziren, eta Oiartzungo, Gipuzkoako eta Baiona-Donostia hiriguneen arteko garraio publiko sarearen loturak antolatzen hasteko saioak izan ziren horiek.
Joana Mendiburu Oiartzungo alkateak izan zuen hitza, eta zehaztu zuen herrian onartu dutela datozen bost urteetarako mugikortasun plana. Bizilagunentzat “mugikortasun jasangarriagoa”nahi dutela azaldu zuen, eta, gehitu zuen horretarako onartu duela udalak aipatutako plan hori. “Zortzi auzoko udalerria, industria eta merkataritza gune handiz inguratuta, joan etorri askoko herria da, eta, esan genezake, Arragua dela joan etorri gehien metatzen dituen auzoa. Bertako bizilagun batekin elkarrizketa labur bat abiatu orduko azaleratuko da gaur egun auzoa zeharkatzen duten ibilgailuek sortzen duten ezinegona”, jarraitu zuen.
Arraguako egoerak “kezka” sortzen duela zehaztu zuen alkateak, baina, era berean, “kezka eta kexa izan daiteke aukera ere”, gehitu zuen. “Gisa honetako jardunaldiak izan daitezela abiapuntua etorkizuna pentsatzeko, garraio publikoa diseinatzeko eta Arragua auzo bizigarriago bat izateko”. Ildo beretik, zehaztu zuen erakunde publikoen arteko elkarlana “ezinbestekoa” dela.
Honela amaitu zuen hitzartzea Mendiburuk: “Erakunde publikoen ardura da garraio publikoak eskaintzen dituen aukera guztiak behar bezala kudeatzea. Horretarako, erakundeen arteko elkarlana eta koordinazioa findu behar ditugu eta gure mugimenduak gidatuko dituen norabidea guztion artean zehaztu”.
Jarraian, hitzorduaren laburpen bideoa.
