Arditurriko bidegorriaren tunela berritzen hasiko dira, "aurki"
Eroritako materiala kentzeaz gain, zenbait geruzatan hormigoia bota eta bi metrotik behin ura drainatzeko zuloak egingo dituzte.
Oiartzungo Udalak jakitera eman duenez, Arditurriko bidegorriaren azken tunela berritzeko lanak “aurki” hasiko dituzte; zehaztu dutenez, 35 metro luze ditu meategiko aparkalekuaren nodoko pasabideak, eta harkaitzean dago zulatuta. Hormigoiz estalitako zatiak ditu tunelak, eta tarte batzuk txapa metalikoz estalita zeudela zehaztu dute.
Euskal Herriko denboraleak, urak eta haizeak batez ere, eusgarriak kaltetu eta pitzadurak sortu dituela azpimarratu dute. Gainera, harriak erori zirenez, segurtasuna bermatzeko tunela itxi zuen udalak, eta oinezko zein txirrindulariak ondoko bidetik pasatzen aritu dira azkenaldian Arditurrira heldu ahal izateko.
Oiartzungo Udalak tunelaren azterketa geotekniko bat eskatu zuen azpiegitura egonkortzeko eta konpontzeko egin beharrekoa zehazteko. Ikuskapena eginda, zehaztu dute datorren astean hasiko dituztela eraberritze lanak: eroritako materiala kendu eta zenbait geruzatan hormigoia botatzeaz gain, bi metrotik behin ura drainatzeko zuloak egingo dituzte. Modu horretan, “babes erresistentea eta iraunkorra” lortuko dituztela gehitu dute.
Berritze lan horiek egiteko 56.000 euroko inbertsioa egingo du udalak. Hiru aste iraungo du konponketa prozesuak.
