Juan Mari Lekuonari oparitutako poema bat gordeko du Euskaltzaindiak
Bitoriano Gandiagak idatzi zuen poema Lekuona euskaltzain oso izendatu zutenean. Euskaltzaindiak gordeko du 1988an egindako oparia.
Euskaltzaindiak dohaintzan jaso du Bitoriano Gandiaga poetak eskuz Juan Mari Lekuonari idatzitako poema bat. 1988an oparitu zion Gandiagak idatzia Lekuonari, oiartzuarra 1987an euskaltzain oso izendatu ondoren. Urte bete beranduago irakurri zuten Oiartzunen Erdi-ahozkotasunaren literatur estiloaz liburuaren sarrera-hitzaldia.
Juan Mari Lekuona Oiartzunen jaio zen 1927an, eta Donostian hil zen 2005ean, 78 urte zituela. Apaiza, Teologian doktorea eta Deustuko Unibertsitateko katedraduna izan zen, eta Euskararen Akademiak Euskaltzain urgazle izendatu zuen 1963ko maiatzean, eta euskaltzain oso, berriz, 1987an.
Oianburu zen Lekuonaren ezizena, eta poeta moduan nabarmendu bazen ere, Zeruko Argia, Olerti, Egan eta El Bidasoa aldizkarietan idatzi zuen. Horretaz gain, ahozko euskal literatura aztertu zuen Ahozko euskal literatura (1982, Erein) liburuan.
Andres Urrutia euskaltzainburuak “maiteki” gogoratzen du Lekuona.
Horrela diote poemaren azken lerroek:
Euskaltzaindiko zeure
sarrera-hitzaldia
txalotzeko dakartzudan
txalopilla eskuetan
noiz lehertukoz beste
bestelakorik aurkitzen
laurogei ta zortziko
uztailaren hogeitahamar
zuretzat, niretzat eta
beste askorentzako
egun hain eder honetan
lagun Juan Mari.
