Astelehenean egingo du eztanda 'Literatura plazara' egitasmoak
Hilaren 17tik 30era izango da 'Literatura plazara' egitasmoa martxan. Literatura erdigunean jarri nahi dute, hortaz, adin guztietako bizilagunei zuzendutako zenbait jarduera antolatu dituzte Oiartzungo hainbat txokotan.
Karmele Mitxelena haurrekin. @1545_argitaletxea Aurreko bi edizioek izan duten arrakasta ikusita, Literatura plazara egitasmoa hirugarrenez antolatzea erabaki du 1545 argitaletxeak. Argitaletxe baten ohiko jarduna egiten dute, baina kultur elkarte bezala ere funtzionatzen dute “literaturaz beste modu batera gozatzeko asmoz”, kontatu du Xabi Salaberria argitaletxeko kide eta egitasmoaren antolatzaileak.
Formatu ezberdinetan haur, gazte eta helduentzat literaturaz gozatzeko aukera eskaintzea da hain zuzen, Salaberriarentzat, Literatura plazara. Gainera, irakurleak batzen dituen literaturarekiko zaletasunaz gain, 1545 argitaletxearen liburuak aurkezteko aukera ere ematen die jardunaldiak, ekitaldietako asko euren liburuekin “oso lotuta” baitaude.
Salaberriak hilaren 28ko Irakurketa festa nabarmendu du guztien artetik; lehenengoz egingo dute, eta helburua bakoitza bere liburuarekin norbere irakurketa egiten egotea da. Elkarrekin, baina bakarrik.
Kontzejupean elkartuko dira, eta irakurtzeko tarte bat hartuko dute hasieran, eta gero denen artean partekatuko dute bakoitzak zer irakurri duen. Jarduera bukatzean askaria egingo dute Orea okindegiaren ogiarekin.
Sarreradun ekitaldi bakarra PUF bertso saioa da, eta online zein egunean bertan eskura daitezke txartelak; bost euro balio du bakoitzak.
Aldiz, gazteen idazketa tailerrerako izena eman behar da helbide honetara idatzita.
“Normalean bakarka gozatzen da literaturaz, eta ekintza horiek aukera polita izan daitezke zaletasun hori partekatzeko”, nabarmendu du.
