Haurtzaro Ikastolak jolasleku berria inauguratu du
'Gotti betti jolastokia' inauguratu dute gaur arratsaldean. 25 zuhaitz landatu dituzte egunean zehar, eta arratsaldean egin dute ekitaldi ofiziala.
Haurtzaro Ikastolak gaur –hilak 14– eman dio ikastolan Zuhaitz egunari hasiera; handira egin du gainera, jolasleku berria inauguratu baitute gaurkoan.
Egunean zehar jolasleku berriko zenbait gunetan zuhaitzak landatu dituzte, eta arratsaldean egin dute eremu berriaren ekitaldi ofiziala.
Jende mordoa inguratu da ekitaldira: haurrak, gazteak, gurasoak… Eta denek zuten helburu bera: jolasleku berria ezagutu eta apurka-apurka hari erabilera ematen hastea.
Eguraldia lagun zuten gaurkoan; hortaz, pozik ekin diote ekitaldiari. Ikastolako zenbait haurrek hartu dute hitza lehenbizi ekitaldiari hasiera emateko, eta jolaslekuaren eraldaketa “hausnarketa” luze baten ondorio dela esan dute. Jolaslekuari izen berria jarrita eta gaurko egunean zehar zuhaitzak landatu ondoren, ofizialki inauguratutzat eman dute espazioa.
Jolasleku berriak nolakoa izan behar zuen erabakitzeko prozesua “luzea” izan dela azpimarratu dute gero, baita parte hartzea zabala izan dela ere. Gotti betti jolastokia moduan izendatu dute ikastolako eremu berria, hori izan baita kideei gehien gustatu zaien izena.
Egunean zehar 25 zuhaitz landatu dituzte gunean, eta tirolina ere jarri dute martxan.
Ikasleen hitzartzearen ondotik, Lorena Zalakain ikastolako lehendakariak eta Joana Mendiburu Oiartzungo alkateak egin dute hitzartzea. Lehendakari eta alkatearen hitzak adi entzunak izan ondoren, dantzari, trikitilari eta bertsolarien txanda izan da.
Zinta moztea egin dute gero, eta horretarako ikastola osatzen duten zenbait taldetako kideak arduratu dira hura mozteaz. Dantza egin diete gero. Musika jotzen hasi eta espazio berrian zehar kantuan eta dantzan hasi dira; geldialdiak egin dituzte zenbait gunetan, eta tarte horietan bertsoak abestu dituzte haurrek.
Gaurko ekitaldiari amaiera izateko, haur jolasak egiteaz gain, txokolateaz gozatzeko aukera izan dute haur zein helduek.
HITZA inaugurazio ekitaldian izan da, eta bildutako irudiekin argazki galeria eta bideo laburpen bat egin ditu.
