Oiartzungo ingurumena zaintzeko zenbait jarduera antolatu dituzte
Oiartzungo Ingurumen Taldea sortu dute, eta kideek antolatutako lehen hitzordua hilaren 23an izango da. 'Natura aztertuz familian' da jarduera.
Oiartzungo Ingurumen Taldeko kideak eta udal ordezkariak. Oiartzungo mendi, baso eta errekak zaintzeko; oro har, natura eta ingurumena zaintzeko, zenbait ekintza antolatu dituzte herrian datozen egunetarako. Horien artetik lehena igande honetan –hilak 16– izango da. Zuhaitz Eguna ospatuko dute oiartzuarrek, eta Pilotasoron bertako haritzak landatuko dituzte bizilagunek. Antolatzaileek jakinarazi dutenez autobusak beteta daude dagoeneko, baina oinez joan daitekeela ere gogorarazi dute. 10:30ean elkartuko dira Pilotasoron landaketa egiteko, eta, amaitzean, hamaiketakoa izango dute bertaratzen direnek.
Era berean, Oiartzungo Ingurumen Talde berriak hitzordu bat prestatu du datorren asterako ingurumenaz gozatzeko asmoz. Ingurumen Taldea “elkarlana, sentsibilizazioa eta zaintza” sustatzeko sortu dute, eta zehaztu dutenez partaideak ez dira berriak, Bazterrak txukuntzen eta Ekotalden jardun dutenak baitira. Orain, ordea, ingurumenaren zaintzan aritzeko helburuarekin elkartu dira bi taldeak, eta fusio horretatik jaio da Oiartzungo Ingurumen Taldea. Udalarekin, herriko eragileekin eta herritarrekin ariko dira elkarlanean.
Aipatutako taldeak zenbait ekintza lerro aurreikusi ditu: kontserbazio eremuak babesten hastea eta kaltetutako puntuen identifikazioa zein zaintza bultzatzea; sentsibilizazio eta heziketaren bidez ohitura jasangarriak sustatu eta ingurumenarekiko harremana indartzea, eta, azkenik, komunitate sarea ehuntzea hausnarketa kolektiboa bultzatuz eta konponbideen inguruko lanketa burutuz.
Ildo horretatik, taldeak datorren asterako antolatu du lehen ekintza udalarekin elkarlanean: Natura aztertuz familia ekimena egingo dute Txarako basoan. Urtaro bakoitzean errepikatuko dute naturaren aldaketak behatzeko eta, bide batez, herritarrek zientziaren bidezko jakintza jasotzeko.
Jarduera hilaren 23an izango da, 11:00etan, eta basoa hurbiletik behatzea, gozatzea eta naturarekiko lotura afektiboa indartzea dira helburu nagusiak. Hitzorduan parte hartzeko izena eman behar da, hemen.
Elkarlana sustatzeko, herriko norbanako eta eragile ezberdinei ere dei egin diete ingurumenaren zaintzan parte har dezaten. “Ingurumenaren gaia hain transbertsala izanik, ongi etorriak izango dira ekarpen eta lanbide desberdin guztiak”.
Zalantzak argitzeko edo informazio gehiagorako helbide elektrikoa luzatu dituzte.
