Topoaren zubibidearen eraisketaren harira, Pasaiako Udalak antxotarren hitza entzutea "funtsezkoa" dela adierazi du
Zubibidea eraisteko egitasmoaren gaineko deus ere idatzita ez dagoen honetan, antxotarren eta udalaren ahotsak presente egon behar duela uste du alkateak.
Topoak Antxo erdibitzen duen tokietako bat.Pasaiako Udala Gaurko albistea da. Eusko Jaurlaritzako Mugikortasun Jasangarriaren Sailak jakinarazi du Antxoko topoaren zubibidea eraisteko eraikuntza-proiektua idazteko lizitazioa egin duela. Horren harira, Pasaiako Udalaren balorazioa iritsi da, Teo Alberro Bilbao alkatearen esanekin. “Albiste garrantzitsua da”, esan du udalaren gidariak, “baina gogorarazi behar da neurri hau antxotarren aspaldiko eskaera baten harira datorrela. Mobilizazioak, interpelazio instituzionalak eta 1.400dik gora sinadura ere izan dira aldarrikapen honen atzean, eta pozgarria da ikustea herritarren lanak fruitu eman duela”. Horregatik, zubibidearen eraisketaren prozesuan antxotarren ahotsa presente izan behar dela aldarrikatu du udal gobernuak: “Espazio horren nolakotasuna definitzeko funtsezkoa da antxotarren hitza entzutea”. Hori horrela, bilera eskatu dio alkateak Mugikortasun Jasangarriaren sailburu Susana Garcia Chuecari.
Herritarren iritzia, baita tokiko erakundearena ere. Ahots horiek zubibidearen gaineko guztietan kontuan hartu behar direla uste du Alberro alkateak, Antxoko topoaren geltoki berriaren lanek zein ondoriozko zubibidearen eraisteak barruti horretan eragin oso nabarmenak (hirigintzakoa, soziala, paisajistikoa…) izango dituelako. “Proiektu honen idazketa martxan jartzeak etorkizuneko Antxon modu integralagoan pentsatzea ahalbidetuko du, herritarrentzako espazio berriak berreskuratuz. Sinetsita nago udalak proiektu honetan parte hartu behar duela; izan ere, herritarrengandik hurbilen dagoen erakundea izanik, horien nahiak eta interesak lehenetsiko baititu”, ebatzi du. Hau da, orain zubibidearen gainean idatzi beharreko paper, plano, ideia eta agiri guztiak zuri-zuri eta letrarik gabe dauden honetan, tokiko erakundearen eta herritarren hitza errespeta daitezela eskatu du, aintzat hartzea. Prozesua ez dadila gidatu Pasaiatik kanpo.
Gaurko albistearen berri izan, eta alkateak aukera baliatu du Antxorako interesezkoak diren beste hainbat hirigintza gairi buruz hitz egiteko. “Gure Zumardia berrurbanizatzea, udalak aurrera eramandako parte-hartze prozesuan herritarrekin adostutako irizpideetan oinarrituta; Luzuriaga birmoldatzea, Antxoko zentro soziokultural gisa; eta gaur egun topoaren zubibideak hartzen dituen espazioak berreskuratzea, herritarren gozamenerako”. Alkateak gogorarazi du bere gobernuak “konpromiso irmoa” duela Antxoren etorkizunari erantzun integrala ematearekin.
