Antxoko topoaren zubibidea eraisteko lanak, lizitaziora
Esleipena bere egingo duen enpresak, zubibidea eraisteko prozesua zehazteaz gain, inguru horren urbanizaziorako proposamena landu beharko du.
Eusko Jaurlaritzako Mugikortasun Jasangarriaren Sailak jakinarazi du Antxoko topoaren zubibidea eraisteko eraikuntza-proiektua idazteko lizitazioa egin duela, 140.000 euroko aurrekontuarekin eta sei hilabeteko egikaritze-epearekin. Egitasmoa lizitazio bidez hartuko duten enpresak edo enpresek, aldi berean, egun zubibideak eta trenbidearen geltoki garaiak hartzen duten espazioaren ondorengo berroneratzea proposatu beharko du. “Hau da, eremu horretarako urbanizazio mota egokiena definitu beharko du”, esan dute Jaurlaritzatik. Euskal Trenbidearen Sarearen (ETS) bidez atera dituzte lizitaziora lanak.
Susana Garcia Chueca Jaurlaritzako Mugikortasun Jasangarriko sailburuak oso baikor baloratu du Antxoko egungo topoaren zubia eraisteko bidean lehen urrats izan daitekeena. “Toki gutxik dute hemen Pasai Antxon bezalako trenaren presentzia hain nabarmena, eta horregatik pozten nau zubibidea eraisteko aurrerapausoak ematea. Altza eta Galtzaraborda arteko lurpeko pasabidea bukatu eta martxan jartzean, biaduktua eraisteko aukera izango dugu eta libre geratzen diren eremuak urbanizatuko ditugu, herritarrek gozatzeko”, azaldu du.
Zubibidea 350 metro ingurukoa da luzeran, eta bi tarte bereizi ditu: lehena etxebizitzen artean dago, eta bigarrena Marealtaren gainean. “Lizitaziora atera den proiektuak alternatiben azterlan baten bidez zehaztu beharko du zein den Pasai Antxoko hirigunean eta paisaian oztopo fisiko hori kentzeko soluziorik onena, eta aztertu beharko du ea eraisteak ingurune urbanoenari bakarrik eragingo dion, etorkizunean ibaiaren gaineko azpiegitura beste erabilera batzuetarako mantenduz, ala eraisketak bigarren tarte hori ere hartuko duen”, azaldu dute sailetik.
Jaurlaritzak aurreikusi du “datorren urtean zehar” izango dela erabilgarri Antxoko lurpeko topo geltoki berria, beraz, egungo trazatuak ez du erabilerarik izanen.
