Errenteria-Oreretako Euskaraldia aurkeztu dute
Aurtengo edizioa maiatzaren 15etik 25era izango da, eta gaurtik aurrera izena eman daiteke. Euskaraz ulertzen duten 16 urtetik gorako herritarrek parte har dezakete.
Naroa Iturri kazetaria eta Naroa Etxeberria herriko Eusakaraldiaren koordinatzaileak izan zuten hitza atzo, Merkatuzarren burutu zuten Euskaraldiaren aurkezpeneko ekitaldian. Hizkuntza ohiturak aldatzeko 11 eguneko praktika proposatzen du jarduerak: bai norbanakoen artean eta baita herriko elkarte, eragile eta enpresen arloan ere. Laugarren edizioaren leloa Elkar mugituz egingo dugu da, eta “euskara gehiago, gehiagotan eta jende gehiagorekin egiteko elkarrekin egiten dugun ariketa sozial erraldoia” gisa definitu dute.
Aurreko hiru edizioek demostratu zuten Euskaraldia benetan eraginkorra dela: parte hartzaileen bi herenek hizkuntza ohiturak aldatu baitituzten, eta hizkuntza portaeren inguruan hausnartu zuten. Herri Batzordea urtarriletik dabil antolaketa lanekin, eta hainbat berrikuntza egongo direla helarazi dute.
Parte hartzaileek ahobizi eta belarrriprest txapak izango dituzte soinean, aurreko edizioetan bezala, aurrean dugunari hizkuntza-erabileraren berri emateko, eta euskaraz aritzera gonbidatzeko. Errenteriak, baina, Euskaraldia hikan ere parte hartuko du, hikaren erabilera sustatzeko. Erronka horrekin ausartzen direnei, txapan “H” pegatina gehituko zaie.
Bestetik, praktikaldia udaberrira pasa da. “Izan ere, eguraldi onarekin kalea gehiago hartzen dugu eta harreman sozialak areagotzen dira… eta bizipoz hori euskararekin lotu nahi dugu”, aitortu dute antolatzaileek.
Euskaraldiaren erregai edo hauspo izango den Hamaikakoa aurkeztu zuten ekitaldian, beren ingurune eta alorretik euskararen erabilerari egiten dioten ekarpena aitortzeko:
- Fadoua El Machour, 8 urterekin Marokotik etorri zen neska. Gaztelera baino lehen ikasi zuen euskara, eskolan.
- Unai Nieto, Ereintza Izarrak taldekoa, kirol egokituko jokalaria.
- Garazi Beloki, aktore, dantzari eta modeloa. Telebista eta zineman euskaraz aritzen dena.
- Xixilio Maritxalar, herrian ezaguna euskalgintzako militantea izateagatik, egun erretiratua.
- Naroa Iturri, kazetaria.
- Aitor Majada musikaria.
- Eneko Gil, dantzaria eta koreografoa.
- Haizea Zurigel, ikaslea eta Touringen futbol entrenatzailea.
- Nayeli Rivadeneyra, Mexiko Hirikoa, Lapurdiko Pizzen jabea.
- Nerea Lizeaga, Oarso Boleibol Taldeko lehendakaria.
- Nere Mujika, euskalgintzako militantea, egun erretiratua.
Eneko Gil, Haizea Zurigel eta Nayeli Rivadeneyrak hitz batzuk egin zituzten, beren esperientziaren berri emanez.
Hasiera bertsoekin ireki zuten bezala, amaiera herriko dantzariekin itxi zuten: “Agurra” dantzatu zieten Euskaraldiko letrak hartu dituzten Hamaikakoari.
Euskaraldian izena emateko, baliatu esteka hau
Informazio gehiagorako, baliatu esteka hau
