'Laburbira' Oiartzun eta Pasaian izango da euskal zinemagintza hauspotzen
Oiartzungo hitzordua hilaren 21ean izango da. Pasaian, berriz, maiatzaren 18an egingo du geldialdia 'Laburbira'-k.
'Pentsatzen dut' ikus-entzunezkoaren irudi bat. Laburbira euskarazko film laburren zirkuitu ibiltaria da, eta hilaren 7tik apirilaren 11ra egingo da. Bi helburu nagusi ditu ekimenak: euskal zinemagintza hauspotzea eta herritarrei euskaraz sortutako film laburrak ezagutaraztea.
Primeran plataformak eta Taupa mugimenduak antolatuta, hilaren 6an Donostiako San Telmo Museoan egin zuten euskaraz sortu eta ekoitzitako film laburren zirkuituaren aurrestreinaldia, eta apirilaren 11 bitartean Euskal Herri osoko 50 herritan izango da ikusgai aurtengo filmen bilduma.
Aurtengo ediziora 35 lan aurkeztu dira, eta horietatik zortzi aukeratu dituzte herriz herri ibil daitezen.
Honakoa da aurtengo filmen zerrenda:
- Prosopagnosia (Ekain Martinez).
- Plazer bat (Sonia Estevez).
- Betiko gaua (Eneko Sagardoy).
- Europa (Ekain Irigoien).
- Pentsatzen dut (Karmele Mitxelena).
- Hor konpon (Jone Arriola).
- Goodbye kepler (Nerea Ayala, Patricia Fañañas, David Modrono, Iraia Yarto).
- Utländsk (Alba Lozano).
Oiartzunen hilaren 21ean –etzi, ostirala– izango dute herritarrek filmak ikusteko aukera, eta hitzordu horretarako sarrerak hemen eros daitezke.
Pasaiako hitzordua, aldiz, maiatzaren 18an izango da, Trintxerpeko Alkateordetzan.
