"Tot ziens" eta "bedankt" esan diete Lizeoko ikasleei
Herbehereetako ikasle talde bat Oarsoaldean eta inguruetan izan dan, Pasaia-Lezo Lizeoko ikasleekin egindako eskola-trukearen harira.
Lizeoko eta herbehereetako ikasleak, hilaren 14an, San Pedron. “Tot ziens” (agur nederlanderaz) eta “bedankt” (eskerrik asko) esan diete Pasaia-Lezo Lizeoko Batxilergoko lehen mailako ikasleei gaur, egunotan Pasaian, Lezon eta inguruetan izan diren ikasle herbeheretarrek. Hezkuntza zentroak ohitura izaten du urtero-urtero hango ikasleekin eskola-trukea egiteko. Bada aurtengoak jada egin du bidea: gaur bertan (hilak 19, asteazkena) bueltatu dira haien sorterrira hilaren 13tik zorabiatzeko moduko agenda oso-osoa gauzatu ondoren. Lizeoko ikasleak urtarrilean izan ziren han.
Zehazki, Roermond hiriko BC Broekhin ikastetxekoak dira zazpi egunez gurean izan direnak. Ikastolako ikasleen familiekin izan dira lotan. Esna izan direnean, gelditzeko tarte gutxi izan dute, trukearen barruko agenda zalapartatsua antolatu baitiete bertako gazteek, atzerritarrak jabe daitezen hemengo ohiturak, paisaiak, tokiak eta hizkuntza zer nolakoak diren. Albaola, Pasaia eta Lezoko txokoak, Donostiakoak, Bilboko Guggenheim, euskal kirolak, gastronomia, Pasaia-Lezo Lizeoa bera eta bestelako asko ezagutu dituzte azken egunetan. Trukearen laugarren egunean (hilaren 16an) Familien Eguna izan zen eta bertan tokiko sendiekin planak egin zituzten; herbeheretarren kultur ekitaldia eta agur festa, berriz, atzo izan zen (asteartea) Donibaneko Juanba Berasategi aretoan.
Lizeoko ikasleek egunotako esperientziak pilatzen dituen bloga gogoz elikatu dute. Esteka hau baliatuta, blogerako sarbidea.
