Ekhi eta Unaxek Oarsoaldera ekarri dute 35.100 euroko zakua
Gazteek lehenengoz hartu dute parte EITBko 'Mihiluze' saioan. Finalean udaberrian ospatzen diren jaien inguruan aritu ziren.
Ekhi Insausti errenteriarrak eta Unax Lanz oiartzuarrak Mihiluze saioko zakua eskuratu dute finala irabazita; hortaz, 35.100 euroko saria Oarsoaldera ekarri dute gazteek. Gazteen lehen saioa zen.
2024-2025 denboraldiko bigarren saria eskuratu dute; aurreko zakua 16.450 eurokoa zen.
Euskara eta umorea ardatz dituen lehiaketa bat da Mihiluze, Ilaski Serrano eta Antton Telleriak gidatzen dutena. Saio bakoitzean hiru bikote lehiatzen dira, eta zenbait proba egin behar dituzte puntuak lortzeko. Hortaz, markagailuan puntu gutxien dituen bikotea kaleratu egiten dute, eta beste bien artean jarraitzen du jokoak. Lehen fasean bezalaxe, puntu gehien lortu dituen bikotea finalera joaten da, eta azken proba bat egin behar izaten dute.
“Udaberrian (martxoaren 31 eta ekainaren 21a artean) ospatzen diren jaiak” zen finaleko “Hamaikakoa” atalean Ekhi eta Unaxi egokitu zitzaien gaia; zenbait jairen izenak jarri zizkieten, eta udaberrian ospatzen diren edo ez erabaki behar zuten.
Hamaika jai zerrendatu zituzten, eta denak asmatuta, 1.000 euro irabazteaz gain, finalaren azken zatia jokatu zuten, “Urrezko galdera”, alegia. Gasteizko erretreta; Maritxu kajoi; Hiru behien zerga; Mutrikuko berdel eguna; Herri urrats; Almadia eguna; Bermeoko arrain azoka; Hondarribiko alardea; Lekeitioko antzar eguna; Baigorriko Nafarroaren eguna eta Txapel txin eguna ziren aukerak, eta horien arten ohitura zaharrenak diren biak aukeratu behar zituzten. Hiru behien zerga eta Lekeitioko antzar eguna aukeratu zituzten gazteek, baita asmatu ere.
Gauzak horrela, 35.100 euroko saria irabazi zuten Errenteria-Orereta eta Oiartzungo gazteek.
https://x.com/mihiluze_eitb/status/1902278610284585403
