Elizalde eskolako jolastokiaren eraberritze prozesuan, aurrera
Natur gunea zabaldu zuen udalak lehenbizi. Orain, ordea, zoruko pitzadurak konpondu, trinkotu eta gunea margotu dute.
Oiartzungo Udalak Elizalde Herri Eskolako kirol gunea margotzeko lanak egin ditu. Jolastokia “guztiz eraberritzeko” prozesua abiatu zuten bertako guraso eta haurrekin elkarlanean, eta “gozamenerako, esperimentaziorako, jolaserako, heziketarako eta elkarbizitzarako” espazio bihurtu nahi dutenez, zenbait fasetan ari dira gauzatzen itxuraldaketa.
Lehen fasean natur gunea zabaldu zuen udalak, berdegune berriak, mendixkak eta jolaserako txoko ezberdinak sortuz. Orain, gainera, kirolerako kantxak berritu dituzte.
Era berean, zoruko pitzadurak konpondu eta trinkotzeaz harago, gune guztia pintatu dute “koloretsuagoa eta biziagoa” izan dadin. Lan horiek 19.000 euroko aurrekontua izan dute.
Harmailak eraldatzeko prozesua abiatu dute berriki “harmailak goxatu, erabilera handitu eta espazio ezberdinen arteko loturak errazteko”.
