Teo Alberro alkatea: "Sutearen intentsitatea jaisten ari da"
Alkatearen arabera, haize bortitza sutearen itzaltze lana zailtzen ari da. Lanean diren larrialdi zerbitzuei eskerrak eman dizkie.
13:00etan piztu da Jaizkibelgo sutea. Suhiltzaileekin, Udaltzaingoarekin, Ertzaintzarekin, Gipuzkoako basozainekin eta bestelako larrialdi zerbitzuetako langileekin batera ezbeharraren inguruan Teo Alberro alkatea, Iraitz Pazos Ingurumen zinegotzia eta udaleko Ingurumen teknikaria. Azken datuak eman ditu alkateak (16:20): “Oso gertutik jarraitzen ari gara sutearen bilakaera. Une zehatz honetan badirudi suaren intentsitatea jaitsi egin dela. Baina momentuz goizegi da esateko kontrolpean dela. Orain ezin da hori ziurtatu, tarteka su garrak ikusten direlako”. Haize ufada bortitzak direla zehaztu du udal agintariak, eta horrek lanak zailtzen dituela, “Espero dut hedatzea gelditzea, eta hori bertan diren larrialdi errekurtso guztien lamagatik izango da”.
Alberro alkatea, sutearen jarraipena egiten.
Alkateak esker ona adierazi die lanean dabiltzan den-denei, eta sutea erabat itzali arteko bidean “animorik beroenak” helarazi dizkie. Izan ere, sutea hasi eta berehala despliege handia izan da Donibaneko Alabortzatik gorako inguru horretan, Mitxintxolatik hurbil.
Oraingoz ez da ezbeharraren informazio askorik, ez nola sortu den, ez eta kalteak zenbatekoak diren. Litekeena da, eta hasierako aurrikuspenen arabera, 4-5 hektarea erre izana. Gainera, inguru horretan hainbat animalia izaten dira, tartean behiak, zaldiak, astoak eta ardiak. Herrigunetik urrun da sutea, beraz, pertsonen edo haien ondasun fisikoen gaineko kalterik ez da aurreikusi.
Eusko Jaurlaritzako Segurtasun Sailak abisu horia ezarria du gauerdira arte, baso-suteen arriskuagatik.
Datu gehiago izan ahala horiek jakinaraziko ditu hedabide honek. Informazio honekin batera doan irudia eta beheko bideoa herritarrek HITZAra bidalitakoak dira.
