Sutea Jaizkibelen
Kontrolpean da jada (18:30) sutearen zatirik handiena. Donibane aldean foku bat itzaltzeke dago.
Sutea Jaizkibelen. Pasaiako zatian ari da erretzen sutea mendia, Donibaneko Alabortzatik gora, hara begira dagoen magalean. 13:00ak aldera hasi dira garrak mendia kiskaltzen. Bidasoko eta Tolosako parkeetako suhiltzaileak sua amatatzeko zereginean dira, Pasaiako Udaltzaingoko kideak ere bertan dira lanean. Suhiltzaileak badiatik ari dira ura hartzen suari aurre egin ahal izateko, Gipuzkoako Foru Aldundiren helikopteroaren bitartez. Haizeteagatik, sutea Alabortza ingurutik Mitxintxola aldera zabaldu da, Hondarribiarantz. Herritarrentzako, printzipioz, ez da arriskurik. Herrigunetik urrun da sutea. Hala ere Udaltzaingoa zein Ertzaintza herritarren segurtasuna bermatzen ari direla esan du Pasaiako Udalak. Aldundiko iturrien arabera, jada 30 hektarea inguru kiskali dira. Hondarrirantz zihoan frontea kontrolpean dela zehaztu du aldundiak, ez ordea Donibane aldekoa: Talaia bide aldean foku bat da indarrean (18:30eko informazioa).
Sutearen lehen orduetako balantzea egin du Teo Alberro alkateak 16:30ean: “Oso gertutik jarraitzen ari gara sutearen bilakaera. Une zehatz honetan badirudi suaren intentsitatea jaitsi egin dela. Baina momentuz goizegi da esateko kontrolpean dela. Orain ezin da hori ziurtatu, tarteka su garrak ikusten direlako”. Haize ufada bortitzak direla zehaztu du udal agintariak, eta horrek lanak zailtzen dituela, “Espero dut hedatzea gelditzea, eta hori bertan diren larrialdi errekurtso guztien lamagatik izango da”. 18:30ean jada kontrolpean zen su-garren zatirik zabalena; esan bezala, suhiltzaileen ahalegina Donibane aldeko fokuan zentratzen ari da gehienbat.
Alkateak esker ona adierazi die lanean dabiltzan den-denei, eta sutea erabat itzali arteko bidean “animorik beroenak” helarazi dizkie. Izan ere, sutea hasi eta berehala despliege handia izan da Donibaneko Alabortzatik gorako inguru horretan, Mitxintxolatik hurbil.
Suhiltzaileez eta udaltzainez gain, Gipuzkoako basozainen partetik giza baliabide asko ezarri dira itzaltze lanetarako. Ertzaintza ere bertan da. Pasaiako Udaleko arduradunak hara joan dira, tokian egin daitezkeenak koordinatzen laguntzeko. Teo Alberro alkatea eta Iraitz Pazos Ingurumen zinegotzia han izan dira, baita udaleko Ingurumen teknikaria ere.
Eusko Jaurlaritzako Segurtasun Sailak abisu horia ezarria du gauerdira arte, baso-suteen arriskuagatik.
Datu gehiago izan ahala horiek jakinaraziko ditu hedabide honek. Informazio honekin batera doan irudia eta beheko bideoak herritarrek HITZAra bidalitakoak dira.
