Askotariko menpekotasunei aurre egiteko, bilera irekia
Herriko egoera zein den ikusita, herritar talde batek adikzio mota ezberdinei aurre egiteko eta horien inguruan hausnartzeko espazio bat sortu nahi du. Hilaren 27an egingo dute lehen bilera.
Gazte bat bideo jokoetan jolasten.Aitziber Arnaiz Garmendia Gaur egun eragiten duten mendekotasun mota ugariez eta askotarikoez arduratzen den herritar talde gisa aurkeztu zuten euren burua duela egun batzuk zabaldutako mezu batean. Iñigo Izargarai da “talde konprometitu” horretako kideetako bat, eta hark azaldu ditu oraindik izenik ez duen taldearen egitekoak. “Ez dugu [mendekotasun] bakar batean zentratu nahi, nahikoa baita ingurura begiratzea zein askotarikoak diren konturatzeko: mugikorrak, jokoak, drogak…”; horrela dio taldeak zabaldutako mezuak.
Duela lau urte egin zuten lehen saiakera gaia errotik heldu eta lantzen hasteko, baina “ezerezean” geratu ziren emandako pausuak, COVID-19a iritsi eta egitasmoa gelditu egin behar izan baitzuten. Orain, ordea, egoerari aurre hartu nahi diote, eta horren gaineko interesa edo kezka duen pertsona guztiekin biltzeko, elkarrekin hausnartzeko eta lan egiteko gune bat sortu nahi dute.
Izargarai ingresatuta egon da zenbait hilabetez ospitalean, eta handik ateratzean jabetu zen egoeraz. “Oiartzungo egoera eta joerak zein ziren jabetu nintzen; tira, beste lekuetan ere horrela izango da, baina Oiartzungo egoera bereziki larria da. Nire inguruan ere arazoak zeudela ikusten nuen, eta gaiari berriz heldu behar geniola pentsatu nuen”.
Herrian “oso gazte” hasten dira alkohola edaten, “eta hurrengo pausua marihuana kontsumitzea izaten da. Kasu batzuetan 15 eta 16 urterekin ere kokaina probatzen dute. Kezkagarria da egoera”, nabarmendu du kezkati. “Dinamika berriak sortu nahi ditugu herrian”.
Ildo horretatik, Izargaraik adikzioei aurre egiterakoan laguntza eskatzearen garrantzia nabarmendu du. “Jendeari laguntza eskatzea kostatzen zaio oraindik. Gaixotasun mental bat da, ez da ezer gertatzen; laguntza eskatu baino ez da egin behar”, aldarrikatu du. Egoera ikusita, beraz, hiru bizilagun Karrikan elkartu, eta zer eta nola egin pentsatzeari ekin zioten.
Drogaren testuinguruak lantzen hasi ziren lehenbizi, eta hara eta hona zebiltzan batean Elizalde Herri Eskolara egin zuten bisita. Hango errealitatea bestelakoa zela azaldu zieten Izargarai eta lagunei. Izan ere, sakelako telefonoen erabilerak zein zigarro elektronikoen eta edari energetikoen kontsumoak arduratzen dituela kontatu zieten.
“Horretaz gain, sumatzen genuen drogarekin oso lotuta zegoela ludopatia, alkoholaren kontsumoa… gauza asko daude lotuta. Beraz, erabaki genuen taldearen jarduna ez mugatzea drogetara bakarrik”. Hala ere, jakitun dira gai horiek guztiak lantzea “zaila” izan daitekeela.
Prebentzioa eta sentsibilizazioa, gako
Alabaina, Izargaraik argi utzi nahi izan du taldearen helburua ez dela drogen kontrako mugimendu bat sortzea, “prebenitzea eta sentsibilizatzea baizik”. Batez ere gazteei begirako zerbait dela ere zehaztu du, baina ez dute soilik adin tarte horretara mugatu nahi. “Drogak gaur egun duen normalizazioa txikitu eta gelditu nahi dugu”, jarraitu du.
Taldearentzat “oso garrantzitsua” da gai horiek guztiak ikusgarri egitea, “herritarren osasuna baita”. Droga berriak sortu dira azkenaldian, eta Izargarairen hitzetan oso arriskutsuak dira horiek. “Horren adibide da fentaniloa. Hemen ez dago, baina zeharo arriskutsua da. Gaia kalera atera behar dugu; kezka horrek kalean egon behar duela uste dugu. Ez dugu esaten debekatu egin behar denik, baina kezka horrekin sentsibilizatu egin nahi dugu”.
Badakite gutxi gorabehera zer egin nahi duten, baina gauzak zehazteko eta taldea handitzeko hilaren 27an, 18:30ean, bilera ireki bat egingo dute Arizmendienean.
