Ezker Anitza-IUk bat egin du arrazakeriaren aurkako martxarekin
Alderdiak adierazi du "arrazakeria eta xenofobia sustatzen dutenen aurrean elkartasuna eta bizikidetza" aldarrikatu behar direla.
Sos Arrazakeria Gipuzkoak, Medicus Mundi Gipuzkoak eta CODE elkarteek deituta, Arrazakeriaren eta Xenofobiaren aurkako XXVIII. martxa egingo da igande honetan (hilak 23). Seguru? Auzo seguruen alde lelopean, martxak Trintxerpe eta Donostiako Alderdi Eder lotuko ditu. Mobilizazioa 11:30ean irtengo da Trintxerpeko azoka ingurutik, eta Alderdi Ederrera 13:00etan iristea aurreikusi dute antolatzaileek.
Ezker Anitza-IU alderdiak bat egin du igandeko mobilizazioarekin, “arrazakeria eta xenofobia sustatzen dutenen aurrean elkartasuna eta bizikidetza” aldarrikatzeko. Horren aurrean, manifestaziora batzeko deia luzatu du alderdiak, eta honakoa nabarmendu du: “Gizarteak bere elkartasuna erakutsi behar du eta Euskadi bertan bizi garen pertsona guztiok osatzen dugula ikusarazi behar dugu, gure jatorria edozein dela ere”.
Elkarte sustatzaileak Seguru? Auzo seguruen alde lelopean mobilizatuko dira, eta Ezker Anitza-IUk bat egin du lelo horrekin: “Auzo seguru eta solidarioetan bizitzearen garrantzia azpimarratu behar da, auzokide guztientzako eskubideak eta aukerak aldarrikatuz”.
Alderdiak “intolerantziaren aurkako eta edozein jokabide arrazista eta xenofobo errotik kentzeko” konpromisoa irmo berretsi du, eta uste du erakundeek “gehiago” egin dezaketela auzoetan bizikidetza eta elkartasuna sustatzeko.
Azkenik, Ezker Anitza-IUk adierazi du “inoiz baino beharrezkoagoa” dela “eskuinaren eta ultraeskuinaren mezu arrazista eta xenofoboak jokoz kanpo uztea, gizartean pertsona anitzenganako eta beste leku batzuetatik datozenenganako gorrotoa zabaltzen” saiatzen ari baitira.
