Jaizkibelgo sutea erabat itzalita, orain, kausak eta ondorioak aztertzeko garaia
Atzoko arratsalde-gau partean bi fokuak kontrolpera eraman, eta gauez itzali dute erabat atzoko 13:00etan hasi zen sutea.
Suhiltzaileak atzo Jaizkibelen lanean.Suhiltzaileak Euskadi / X Atzoko (osteguna) 13:00ak aldera Jaizkibelen, Donibanen, piztu zen sutea erabat itzali dute suhiltzaileek. Alabortzatik gora, Talaia bidearen inguruan sortu zen, eta bi mingain izan zituen: Hondarribia aldera joan zena 17:30ak alderako kontrolpean zen; bestea, Donibanekoa, gauez eremutu zuten. Bi fokuak kontrolpean izan ondoren erabat itzali zituzten, ostegunaren eta ostiralaren arteko mugan. Ordutik, zaintza lanean izan dira gau eta goizalde osoan zehar suhiltzaileak mendian; sustoa ere izan da, 04:00ak aldera foku bat berpiztu delako. Hura ere amatatu dute.
Lehenengo lana sua itzaltzea zen. Lurrez eta airez lanean izan ziren larrialdi zerbitzuak atzo arratsalde eta gaurko goizaldearen artean. Orain, kausak eta ondorioak aztertzeko garaia iritsi da. Lehen ondorioa, 30 bat hektarea erre direla, Gipuzkoan azken urteetan izan den suterik handienetakoa izan da Pasaiakoa. Eremu babestua da Jaizkibel, eta balantze sakonagoen zain, litekeena da balio handiko zuhaiztiak eta landareria kiskali izana. Gainera, suak bidea egin zuen eremuetan animaliak izan ohi dira, zaldiak, behiak eta ardiak besteak beste.
Eusko Jaurlaritzako Segurtasun Sailak abisu horia ezarria zuen atzoko gauerdira arte, baso suteen arriskuagatik. Tenperatura epela, eta hego haize bizi-bizia atzokoan. Aztertzeko dago gizakiaren eraginez piztu ote zen atzoko sutea, oraindik ere goizegi baita zerk eta zergatik sortu zuen jakiteko. Baina nabaria dena da Jaizkibelen historian halakoak maiz, maizegi gertatu direla. Oarsoaldeko eta Bidasoko arnasgune natural eta babestu denean sarritan gertatu dira atzokoak bezalakoak.
Egoki, azkar batean erantzun zuten larrialdi zerbitzuek atzokoan. Bidasoko eta Tolosako parkeetako dozenaka suhiltzaile, aldundiko basozainak, Pasaiako Udaltzaingoa, Ertzaintza, Babes Zibila… Atzoko suaren kontrako borrokarako mugiarazi ziren baliabide humanoak asko izan ziren. Pasaiako Udaleko ordezkari eta arduradunek ere zuzen-zuzenean egin zuten ezbeharraren jarraipena. Haiei guztiei esker suaren bidea ez zen handiagoa izan.
