Kanaberak, gora: "Arrantza bai!"
Portuaren eremuetan aisia arrantza egitearen debekuaren kontra azaldu dira gaur ehunka arrantzale San Pedro eta Trintxerpe artean.
Manifestazioa egin aurretik, elkarretaratzea eta talde argazkia egin. dute arrantzaleek. Otsailaren bukaeran Pasaiako Portu Agintaritzak gogorarazi zuen haren eremuetan debekatua dagoela aisia arrantza egitea. Hala balitz, indarrean den araudia zorrotz betetzen hasiko zela iragarri zuen, isunak ezartzeko aukera berrartuz. Horrek haserrea eragin du inguru horietan aisia arrantzan aritzen direnen artean. Gaur goizean kalera atera dira arrantzaleak, kanabera gora, “arrantza bai” esateko. Arrantza Askearen Mugimenduak deitu ditu mobilizazioak.
Lehenik eta behin, 09:00etan hasita, bi orduko elkarretaratzea egin dute ehunka arrantzalek San Pedron, lonjaren atariko zabalgunean. Topagunea bitartean antolatzaileen eta arrantzaleen testigantzak entzun ahal izan dira. 11:00ak pasatxo zirenean manifestazioa egin dute San Pedrotik Trintxerpera, eta buelta. Ehunka izan dira martxarekin bat egin dutenak, ia denek eskuan kanaberak zituztelarik, gorantz begira.
Gaurko protestaldiaren ezaugarritzea honakoa izan da, deitzaileen arabera: “Pasaiako portuan, batez ere haur eta adineko pertsonentzat, arrantzak duen kirol eta kultura balioa kontuan hartuta, debeku hutsaren ordez konponbide bidezkoago baten alde borrokatu behar dugu”. Hala, San Pedroko lonjaren atarian esan dute negoziaziorako eta akordiorako aukera babesten dutela, “gurekin hitz egin dezatela. Konponbidearen nahi dugu”. Zehaztu dute araudien alde direla arrantzaleak, “denak neurria behar duelako”, baina “benetako arrantzaleak” ez direla “arazo”, esan dute, baizik eta praktika txarrak egiten dituen “gutxiengo bat”. Haien aisia arrantza jasangarria dela nabarmendu dute, ingurumenarekin ez duela talkarik egiten; “ordea, itsasoetan milaka tona plastiko daude. Horren kontra bai egin behar dela borroka”. Pasaian bakarrik ez; arrantza egiteko debekua kostaldeko beste herri batzuetan ere indarrean dela azaldu dute, “debekua ez da bidea. Negoziazioa eta erregulazioa, bai”.
“Bagara zerbait. Asko gara. Pertsonak gara, eta arrantzaleak. Errespetua eskatzen dugu”, aldarrikatu dute. Mugimenduarekin bat gero eta jende gehiago ari dela egiten jakinarazi dute, eta uste dute haien ahotsa entzuna izan behar dela, “debekua altxatzea eskatzen diegu portuei eta Jaurlaritzari”. Arrantzaren zaleek diote eremu horietan jarduera hori ezabatzeak “arriskuan” jartzen duela “belaunaldiz belaunaldi transmititu den tradizio bat. pasaitarren tradizio bat”.
Jarraian, egin dituzten elkarretaratze eta manifestazioaren hainbat irudi eta bideoa.
