Udalak sei hiri garbigune ezarri ditu
'Etorkizuna birziklatzen' kanpaina hirugarren fasean sartu da gaur, udalak sei hiri garbigune jarri baititu udalerriko hainbat puntutan, egunero erabilgarri izango direnak.
Iazko Pasaiako birziklapen datuak kezkagarriak izan ziren, Gipuzkoak eta Europak zehazten dituzten datuetatik urrun baitago udalerria. 2024ko birziklapen tasa %48koa izan zen, eta datu horiek iraultzeko eta “gehiago” eta “hobeto” birziklatzeko, Pasaiako Udalak Etorkizuna birziklatzen kanpaina abiatu zuen urtarrilean. Kanpaina hori urratsak egiten ari da, eta hirugarren fasean murgildu da gaur: sei hiri garbigune ireki ditu udalak udalerriko hainbat puntutan.
Hiri garbiguneak etxean sortutako hondakin bereziak biltzeko guneak dira. Horiek ezartzearen helburua izan da herritarrek etxean dituzten hondakin bereziak jasotzea, hilabetero San Markotik etortzen den kamioi zerbitzua ordezteko.
Udalak sei gune ireki ditu, eta herritarrek erabilgarri izango dituzte asteko edozein egunetan. Trintxerpen hiru ezarri ditu udalak: Errenteria kalean, Donostia kaleko igogailuaren alboan eta Serafin Esnaola eta Gudari plazaren artean dagoen lokalean. Gainontzeko barrutietan, hiri garbigune bana jarri da. San Pedrokoa Herriko plazan zegoen arrandegian jarri da, ikastolako arkupeetan; Donibanekoa frontoiko behe solairuan kokatu da; eta, Antxokoa, aldiz, Gure Zumardiko atari alboan, komunak eta Garbitxokoa zeuden lekuan. Antxokoa izan ezik, hiri garbigune guztiak erabilgarri daude jada. Antxokoa apirilean aktibatuko dutela zehaztu du udalak.
Honakoa esan du Iraitz Pazos Ingurumeneko eta Obra eta Zerbitzuetako zinegotziak ezarri berri diren hiri garbiguneen inguruan: “Hiri garbiguneen ezarpenarekin, herritarrei erraztasunak eman eta hondakinen bereizketan urrats bat egiteko ahalegina egin nahi izan du udalak, ulertzen baitugu herritarrei esfortzua eskatzeaz gain, udalak ere baduela ardura partekatu bat hondakinen gaian. Orain denon ardura izango da ongi erabiltzea”.
Zerbitzu horri esker, udalak 8.721,40 euro aurreztuko dituela baietsi du udal erakundeak, zerbitzua zuzenean emango baitu, eta ez San Markoko kamioiaren bidez. Lokalak egokitzeak 56.717,76 euroko hasierako aurrekontua izan dute. Horrez gain, Gipuzkoako Foru Aldundiak 27.442,54 euroko diru laguntza eman zion udalari bere helburuak gauzatzeko.
Hauexek dira hiri garbiguneetan utzi behar diren hondakinak:
- Margoak, barnizak, disolbatzaileak, kolak, fitosanitarioak (insektizidak eta herbizidak), aerosolak eta horien ontziak.
- Tamaina txikiko txatarra: lapikoak, zartaginak edota metalezko erretiluak.
- Aparailu elektriko eta elektroniko txikiak: plantxak, lehorgailuak edota kafeterak.
- Kafe kapsulak.
- Egurrezko material edo zati txikiak.
- Material informatikoa: teklatuak edo saguak.
- Tonerrak eta tina kartutxoak.
- Pilak.
- Bonbillak.
- Fluoreszenteak.
- Telefono mugikorrak eta horien bateriak.
- CD eta DVDak.
- Kable elektrikoak.
- Galdutako gauzak: dokumentazioa, NANa, txartelak, giltzak, karterak edota betaurrekoak.
