Elizalden auzogune berria eraikiko dute datozen urteetan
Urmendi haur eskola, Mendibil eta Tolarieta arteko eremuan garatuko dute gune berria, eta proiektua lantzeko bi saio egingo dituzte. Lehena hilaren 31n izango da.
Oiartzungo Udalak jakitera eman duenez, Urmendi haur eskola, Mendibil eta Tolarieta arteko eremuan Elizaldeko auzogune berria garatuko dute datozen urteetan. Aipatu dutenez, 2015ean onartutako Hiri Antolamendurako Plan orokorrean 200 etxebizitza berri inguru egingo direla aurreikusten da, horietatik gehienak babestuak izango direlarik –alokairu sozialekoak eta tasatuak–.
Udalaren hitzetan, herriko auzo nagusia zabaldu eta familia berrientzat bizitokia izateaz gain, oiartzuar guztien erabilerarako ekipamendu eta espazioak ere izango dira. Elkarbizitzarako plaza eta berdegune “zabalak” izango direla ere aipatu dute.
Joana Mendiburu Oiartzungo alkateak azaldu duenaren arabera, eremuak duen tamaina eta kokapenagatik hirigintza “modu ezberdinean egiteko toki estrategikoa” eskaintzen du. “Toki ezin hobea da etxe bila dabiltzan oiartzuarrei etxebizitza eskaintzeaz gain, jasangarritasuna modu zabalenean zainduko duen hirigintza egiteko: elkartzeko gunea izango dena, mugikortasun aktiboa bermatuko duena, kaleko bizitza sustatuko duena eta genero ikuspegia txertatuko duena”, dio.
Gune berria herritarrekin batera diseinatu nahi dute behar ezberdinak herritarrekin definitzeko. Era berean, eremuak duen kokapenagatik “bereziki ongi” landu nahi dute plaza eta espazioei zer bizitza emango dieten.
Gauzak horrela, bi saio ireki egingo dituzte, eta lehena hilaren 31n izango da. Lehen hitzordu horretan proiektua azalduko dute. Bigaren saioa apirilaren 7an izango da, eta dinamika ezberdinen bidez herritarren proposamenak jasoko dituzte bertan.
Bi hitzorduak Landetxe kultur aretoan izango dira, 18:00etan, eta euskaraz izango badira ere gaztelaniara itzulpen zerbitzua egongo da. Haurrak zaintzeko zerbitzua ere eskainiko dute guraso gazteak bertaratzeko aukera izan dezaten.
