'Gure haurrak ere badira' esan dute Haurtzaro Ikastolan
Gure Haurrak Ere Badira egitasmoak deituta, kontzentrazioak egin zituzten atzo Palestinarekiko elkartasunean eta haur palestinarren defentsan.
Gure Haurrak Ere Badira egitasmoak deituta, “urgentziazko kontzentrazioak” deitu zituen atzoko egunerako Palestinarekiko elkartasunean eta haur palestinarren defentsan. Gobernu eta erakundeei Palestinako genozidioaren aurka “argi eta tinko” posizionatzeko eskatu zieten deialdian, euskal herritarrak sarraskiaren konplize izan ez daitezen neurriak har ditzaten.
Euskal Herriko ikastetxe guztiei zuzendutako deialdia zen atzokoa; hortaz, eskolak hasi aurretik edo ondoren eraikinen aurrean kontzentrazioak egitera deitu zituzten hilaren 24 honetan.
Horrela dio Gure Haurrak Ere Badira egitasmoak: “Israelgo armada sionistak, AEBren laguntzarekin, su etena apurtu eta beste sarraski bat egin du. Lotan ziren bitartean, 400 zibil palestinar baino gehiago erail ditu ordu gutxitan, horietako gehienak haurrak. Beste behin ere, Palestinako herriaren suntsipen sistematikoaren lekuko izan behar dugu. Gure barrenak berriz ere irauli dizkigute eta inpotentzia nagusi da. Jada suntsitua den herrialdean, hondakin artean bizi diren gizon, emakume eta haurrak bonbardatzen ari dira inolako bereizketarik gabe. Bien bitartean, Europak beste aldera begiratzen du, lotsagabeki”.
Hortaz, ahotsa altxatzeko deia egin zuen egitasmoak. “Ezin dugu basakeria hau normalizatu. Erailtzen ari diren haur horiek gure seme-alabatzat hartu, guraso horiek gure arreba-anai bezala sentitu eta lau haizetara oihukatu behar dugu: aski da!”, zioten.
HITZAk Oiartzungo Haurtzaro Ikastolako irudiak bildu ditu, baina beste ikastetxeren batek irudiak bildu nahi baditu, idatz dezala mezu bat HITZAra.
