'No other land' dokumentala eta solasaldia, etzi, Landetxen
Dokumental luze onenaren Oscar saria irabazi du ikus-entzunezkoak. Hamdan Ballal lanaren zuzendarietako bati eraso egin diote berriki kolonoek.
Oiartzungo Udalak antolatuta, No other land ikus-entzunezkoa emango dute hilaren 28an Landetxe Kultur Aretoan. Palestinako gatazka politika eta gerra ardatz dituen dokumentala da pieza, Yuval Abraham, Basel Adra, Hamdan Ballal eta Rachel Szor-ek zuzendua.
Basel Adra Zisjordaniako Masafer Yattako ekintzaile palestinar gaztea da dokumentalaren protagonista. Haurtzarotik ari da Adra agintari israeldarrek beren komunitatetik masiboki kanporatzearen aurka borrokan, eta, bere jaioterriko herria dokumentatzen du protagonistak. Hark bildutako irudietan Israelgo gobernuaren soldaduek etxeak apurka-apurka nola eraisten dituen eta biztanleak nola kanporatzen dituen filmatzen du. Adrak, ordea, une jakin batean Yuval kazetari israeldarra ezagutuko du, eta Adra bera lagunduko du. Bien arteko harremana, ordea, eten egingo da Basel okupazio militarren pean bizi delako, eta Yuval, haatik, aske eta inongo murrizketarik gabe.
Dokumentala arabieraz izango da, baina gaztelaniako azpitituluak izango ditu.
No other land dokumentalaren ondotik, Palestinako gatazkaren inguruko solasaldia egingo dute Landetxen bertan.
Dokumental honek dokumental luze onenaren Oscar saria irabazi du. Halaber, Yuval Abraham kazetariak X sare sozialaren bidez jakinarazi zuen kolono talde batek Susya hiriaren aurkako erasoaldi batean Ballal zuzendariaren etxea eraso eta hura jipoitu zutela. Abrahamen arabera, anbulantzian zegoela soldaduek jipoitu eta atxilotu egin zuten.
Alabaina, ordu batzuk geroago baieztatu zuen kazetariak Ballal aske utzi zutela eta familiarenera joatekoa zela.
