Euskaltegietan, eskuak ore artean
Mintzagun egitasmoaren barruan, Edurne Agirre okina ogia egiten ikasteko tailerrak ematen ari da euskaltegietan.
Zorioneko dira Oarsoaldeko euskaltegietan matrikulatuta daudenak. Izan ere, Mintzagun egitasmoaren barruan, etxean ogi goxoa egiten ikasteko tailerrak jasotzen ari dira. Edurne Agirre okina ari zaie eguneroko dietan ageri den jakia nola egin irakasten. Jada Oiartzungi Intxixu AEKn eta Errenteriako Udal Euskaltegian eginak ditu ikastaroak; bihar (hilak 27, osteguna) Lezoko Oroitzene AEKn izango da Agirre (18:00), apirilaren 3an Errenteria-Oreretako Xenpelar AEKn (18:00), eta apirilaren 10ean Antxoko Txirrita AEKn (09:30).
Oarsoaldeko Euskara Batzordearen egitasmoa da Mintzagun; eskualdeko lau udalak batzordekide dira. Hala, jardueraren barruan ikasturtero sei gai jorratzen dituzte euskaltegietan, eta bakoitzarekin tailer bana egiten dute ordu eta erdiko iraupenekoak. Asmoa, gai erakargarri, berri edo gaurkotasunezkoak euskaraz eskaintzea da ikasleen bizipenetan gai hori beti euskaraz agertzeko, lehen kolpean behintzat. “Edozein gai euskaraz jorra daitekeela eta ikasleak ulertzeko gai direla ohartaraztea ere Mintzagunen helburu nagusien artean daude”, zehaztu dute Oarsoaldeko Euskara Batzordetik.
