Oarsoaldeko III. Elektronika Topaketa egingo dute Pasai Donibanen
Apirilaren 12an izango da ekitaldia, Juanba Berasategi Aretoan. Egunean zehar Pagoako erakusketa izango da, eta 8 Dj ariko dira.
Xantixa Kultur Elkarteak eta Oarso Groove-ek antolatuta, Oarsoaldeko III. Elektronika Topaketa egingo dute apirilaren 12an, Pasai Donibaneko Juanba Berasategi Aretoan.
Antolatzaileek adierazi dutenez, hirugarren edizio honetan “merezi duen lekua” eman nahi diete Euskal Herrian eta, batez ere Oarsoaldean, elektronika eszenari urteetan ekarpen handia egin dieten artistei.
Pagoa Kafe Antzokiari eta bertan lan egindako jendeari omenaldia egin nahi diete; beraz, Juanba Berasategi Aretoan garaiko kartelak eta flyerrak ikusgai jartzeaz gain, klub hartatik pasatako artisten izenak gogoraraziko dituzte.
Aurtengo edizioa zortzi Dj ariko dira. 16:30ean ateak irekiko dituzte, eta 17:00etan Markinson eta Mane Galinhak emango diote hasiera ekitaldiari Warm Up-a eginez. Gero Gobus eta Drumfolderren txanda izango da bi orduz.
Antolatzaleek jakinarazi dute, bestalde, diseinatzaile artistikoari eta Pagoako “goiz bukaezin haiek” musikatu zituen Oreretako Nomaklito Kolektiboari omenaldia egitea dela helburua; ondorioz, lau kide ariko dira musika zuzenean jartzen: Unai Bellamy, Anartz, Juantxi eta Alex.
Informazio gehiagorako, egin klik hemen.
