Hibaikako Emakume Gazte eta Absolutuentzat garaipena Zumaian
Datorren asteburuan Gipuzkoako Batel Ligako txapelketarako sailkatze estropada eta txapelketa jokatuko dira Pasaiako Badian.
Hibaikako Emakume Absolutuen ontzia, aurrekoe stropada batean.J.A Rodriguez Bikain ari dira Gipuzkoako Batel Ligan Hibaikaren Gazte Mailako eta Absolutuen kategoriako emakumeak. Larunbatean jokatu zen ligako azken estropada Zumaian, 11. jardunaldia zehazki, eta horretan ere, euren kategorietan onenak direla erakutsi zuten errenteriarrek garaipena lortuta. Sailkapen taulan lehen postuetan daude Hibaikako emakumeak bi kategoria horietan, eta dena ondo bidean, txapelketa poltsikoratuko dutela aurreikusi daiteke. Ligako emaitzei erreparatuta jokatutako 9 jardunaldien artetik —Tolosan ez dira aritzen promesetatik gorakoak— Getaria, Urdazuri eta Zumaiakoan izan dira irabazleak; etxean jokatutako estropadan, Trintxerpekoan eta Orion, bigarren sailkatu ziren; eta San Pedron eta Donostian jokatutako bietan, hirugarren.
Emakume Absolutuak berriz, jokatutako bederatzi jardunaldietatik seitan izan dira irabazleak (Orereta, San Pedro, Trintxerpe, Getaria, Urdazuri eta Zumaia); bitan bigarren (Donostia eta Orion) eta batean, hirugarren (Donostian).
Gainontzeko kategorietan ere lehen postuetan ez, baina lanean fin aritu direla argi utzi dute harrobikoek. Txikitatik handietara hasita, Haur Nesketan, lehiatu ziren 15 ontzien artetik, 11. sailkatu ziren larunbatean Zumaian jokatutako estropadan Hibaikakoak. Promesa Nesketan, hiru ontzi ditu talde errenteriarrak uretan. Horietatik lehena, Hibaika A seigarren sailkatu zen larunbateko jardunaldian; Hibaika B, hamabosgarren; eta Hibaika C azken postuan, hamazazpigarren.
Promesa Mutiletan, seigarren sailkatu ziren larunbateko estropadan, eta sailkapen orokorreko bosgarren postuari eutsi diote. Gizon Absolutuen ontzia, azkenik, laugarren sailkatu zen Zumaian jokatutako estropadan. Sailkapen orokorra, hemen klik eginda kontsulta daiteke.
Begirada guztiak, orain, datorren asteburuko bi jardunaldietan dituzte Hibaikakoek. Larunbatean Gipuzkoako Batel Ligako txapelketaren sailkatze estropada jokatuko dute Pasai Donibanen, 15:00etan hasita. Hurrengo egunean, apirilaren 6an, txapelketa jokatuko dute Pasaiako Badian ere, 10:30ean hasita.
Gipuzkoako Batel Liga bukatuta, Trainerilla Liga hasiko da. Maiatzaren 1etik 11ra jokatuko da azken hori, eta lau jardunaldi egingo dituzte San Pedro (maiatzak 1, 11:00etan), Hondarribia (Maiatzak 3, 11:00etan), Getaria (maiatzak 4, 11:00etan) eta Mutrikun (Maiatzak 10, 16:00etan). Mutrikuko estropada, Trainerilla Ligako txapelketarako sailkatze estropada izango da. Txapelketa, berriz, maiatzaren 11n jokatuko dute, Pasai Donibanen, 10:30ean hasita.
Larunbateko Zumaiako estropadaren emaitzak ikusteko klikatu hemen.
