Elkarlana delako elkartasunaren gakoa
Data berdintsurako jarduerak antolatzen ari ziren Oiartzungo Gure Esku eta Olarri dantza taldea, eta elkarri traba egin beharrean 'Herri libre bat!' egitarau bateratua sortu dute.
Egun seinalatua da Gure Eskurentzat ekainaren 7koa. Erabakitzeko eskubidearen aldeko mugimendu herritarra da Gure Esku, Euskal Herriko lurraldeetan etorkizun politikoa erreferendum bidez erabakitzea helburu duena “normaltasunez, libre eta demokratikoki”. Bada, ekainean ere horretxen beraren aldarria egingo dute Bilbon deitu duten nazio mobilizazioan. Aitziber Arnaiz Garmendia Oiartzungo Gure Eskuko kidea da, eta zehaztu du Bilboko deialdiaren atarian herria girotu eta erakundearen mezua zabaltzeko zenbait ekitaldi antolatu dituztela. “Asko hitz egiten da Gure Eskun herri nortasunaz, baina zer gara gu? Euskaldunak gara, eta aldarrikatu nahi duguna da herri bat garela”, azaldu du.
Herri nortasunaren inguruan hizketan ari zirela, hausnarketarako tartea zabaldu zuten Oiartzungo Gure Eskukoek, eta pentsatu zuten pertsona bat lehenengo bere etxeko sentitzen dela; Oiartzun batean bere auzoko… Norbere nortasuna, beraz, eraikitzen joaten da, eta une horretan sortu zituzten herri nortasuna azpimarratzeko Oiartzuarra naz ta harro noz elastikoak eta tote motako poltsak. Herri nortasun hori aldarrikatzeko sortu zuten materiala, baina orain pauso bat harago joan, eta nazio mailan Gure Eskuk egin dituen kirol elastikoak jarri dituzte salgai jauzi hori irudikatzeko, “oiartzuarra naiz eta harro nago, eta Euskal Herrikoa naiz eta harro nago” esateko, alegia.
Baina material hori sortzea ez da girotze horretarako abiatu duten jarduera bakarra, hilaren 12 eta 13an Elkartasunetik elkarlanera asteburua ospatuko baitute Oiartzunen. Kataluniako ordezkaritza bat ere izango da herrian egun horietan. Ez da lehen aldia kataluniarrak Oiartzunera etortzen direla, Arnaizek kontatu baitu momentu batzuetan antolatu dituztela zenbait ekintza elkartasuna eta babesa adierazteko “bai beraiek guri, bai guk haiei”.
Asteburuari forma ematen ari zirela jakin zuten Olarri dantza taldea ere egun horietarako zerbait antolatu nahian zebilela, eta gainera buruan zutela Kataluniatik “gure ezagunak eta lagunak” diren dantza taldeak ekartzea. Elkarri traba egin beharrean koordinatu, eta dantza taldearen eta Oiartzungo Gure Eskuren artean antolatu dute asteburua. Elkarlana delako elkartasunaren gakoa.
Bi eguneko egitaraua herriarentzat
Ane Otegi Olarri dantza taldeko dantzaria da, eta Euskal Herriko Dantzari Eguna Oiartzunen antolatu zenetik hamar urte igaro diren honetan, Dantzari Eguna antolatzea bideragarri ikusi zutela kontatu du. “Guretzat egun hori ez da teknikoki bikaintasuna bilatzen duen egun bat, euskal kultura, dantzariak, dantza motak eta musika uztartzen eta sendotzen dituen egun bat baizik”, nabarmendu du.
Otegiren hitzetan Oiartzunen pisu handia du kulturak, hortaz, “herriari eskaintzen diogun egun bat da”. Gipuzkoako, Nafarroako, Ipar Euskal Herriko eta Kataluniako dantzariak elkartuko dira Oiartzunen, eta Otegik herriko plazan egingo duten eskertza ekitaldi nagusia nabarmendu du. “Egun horretatik espero dugu denek ondo pasatzea, euskal kulturak eta euskal dantzek garrantzia hartzea eta batez ere sumatzea dantza horiek bizirik jarraitzen dutela. Euskal Herriko dantza talde askok lanean jarraitzen dugu, eta gure lana islatzea nahi dugu”.
Gure Eskuren Herri libre bat asteburua, ondorioz, larunbat arratsaldean (hilaren 12an) hasiko da. Drac-aren (herensugea) emanaldia izango dute Altzibarren, eta Bazkun Zahar elkartean afalduko dute gero; bertan afaltzeko 646 00 39 84 zenbakira idatzi behar da.
Hilaren 13an, berriz, mendi ibilaldi bat egingo dute, eta bidean topatuko dituzten euskal ikurrei —Urkabe, Beloaga eta plaza— omenaldia egingo diete herritarrek, bertsolariek, baita musikariek ere. Hamaiketakoa ere egingo dute, eta plazan izango da gero azken ekitaldia, eguerdian.
Jexux Olaziregi Gure Eskuko zuzendaritzako kidea da, eta hark asteburu horren garrantzia nabarmendu du: “Asteburu hori oso garrantzitsua da guretzat, bereziki ekainaren 7ra begira herrian egiten dugun lana plazaratzeko eta hauspotzeko”. Oiartzunen ekitaldi propio bat egiteko aukera ikusi zutela kontatu du Olaziregik, eta asteburuarekin batera hauspotuko dute aldarrikatzen dutena: harrotasunez bizi dutela oiartzuar izatea eta bide hori partekatu nahi dutela kataluniarrekin.
Ekainaren 7koa berriz, bi urteko planteamendu batean kokatu du. “Ekainaren 7aren ostekoa ez dago soberan diseinatuta, une interesgarri batean bizi gara”, gehitu du. Hala ere, argi dauka zein den Bilboko hitzorduaren helburua: “Gu garena erakutsi behar diogu gure herriari, estatuei eta baita nazioarteari ere; ispiluaren aurrean jarriko dugu herri hau. Ekainaren 7ari, larritasunik eman gabe, dimentsio handia eman behar zaio, herri baten apustu bat baita”, jarraitu du.
Olaziregik, azkenik, nabarmendu du Gure Eskuk lau kontzeptu nagusitan sakondu nahi duela: aitortza; erabakia; burujabetza eta elkarrekin eragitea.
Arnaizek argi utzi nahi izan du Gure Eskuren mezua “euskal herritar guztiek edo ia guztiek” senti dezaketela bere. “Guk erabaki nahi dugu zer izan nahi dugun; nork esango dio ezetz horri?”.
