Etxebizitza tasatuak arautzeko ordenantza aldatzea erabaki dute
Martxoko udal osoko bilkuran aho batez onartu dute erabakia. Bigarren eskuko etxebizitzak udalak egingo dituen zozketa bidez esleituko dira.
Martxoko udal osoko bilkura eginda, Oiartzungo Udalak saioaren inguruko zenbait xehetasun eman ditu; tartean, aho batez erabaki zutela herriko etxebizitza tasatuak arautzeko ordenantza aldatzea. Zehazki, aldaketaren berritasun nagusia salerosketari lotutakoa da: orain arte etxebizitza tasatu baten jabeak lortzen zuen eroslea, eta, udala etxebizitzaren prezioa zehazteaz gain, erosleak etxe tasatu bat eskuratzeko baldintzak betetzen zituela egiaztatu besterik ez zuen egiten. Alabaina, aurrerantzean, “aukera berdintasuna” bermatzeko eta udalak zehazten duen prezio eta baldintzetan salduko dela ziurtatzeko, bigarren eskukoak ere udalak egingo dituen zozketa bidez esleituko dira, lehen promozioetan egiten den moduan.
Joana Mendiburu alkateak saioan adierazi zuen 90 etxe tasatu inguru daudela gaur egun Oiartzunen, eta etorkizuneko promozioetan beste 160 inguru aurreikusten direla. Gauzak horrela, epe ertainera 250 etxe tasatu egongo lirateke Oiartzunen, eta “salerosketa zuzena eta gardena” bermatu nahi du udalak. Ildo horretatik, hogeita hamar eguneko epea ireki dute aldaketa proposamenari alegazioak aurkezteko, eta behin betiko onartzen dutenean irekiko dute interesatuen zerrendan izena emateko epea.
Lehen berdintasun plana, aho batez onartuta
Osoko bilkuran, bestalde, udal barruko lehen berdintasun plana onartu zuten aho batez. Lau urteko iraunaldia izango du plan horrek, “eta barrura begirako neurriak ez ezik, Oiartzun berdinzale eta feministagoa izateko ezinbesteko tresna izango da”.
Nora Velez del Burgo feminismo zinegotziak azaldu zuen planak, hala nola, prozeduretan, diru laguntzetan, ordenantzetan eta beste hainbat esparru eta lanketetan genero ikuspegia txertatzeko formakuntza jasotzen duela. Gainera, kontziliazio neurriak edota indarkeria matxistei aurre egiteko udal barruko protokoloak ere aurreikusi direla nabarmendu zuen. “Gure udaleko errealitateari benetan erantzuten dioten neurriak jasotzen ditu eta bat egiten du herrira begirako plan feministarekin ere”.
Urmendi Haur Eskolaren inguruko mozioa mintzagai
EAJk Urmendi Haur Eskolaren inguruan mozioa aurkeztu zuen, eta hori ere aztertu zuten bilkuran. Gaur egun EAEko herri gehienetan Haurreskolen Partzuergoa modu orokortuan zabalduta badago ere, oraindik udalek kudeatzen dituzten zenbait udal haur eskola badaudela adierazi zuten; tartean, Oiartzungoa.
Janire Mitxelena bozeramaileak azaldu zuen Urmendi EAEko partzuergo sarean integratzeak herriari “zenbait onura” ekarri diezazkiokeela: “Zerbitzu publikoa, kalitatezkoa eta doakoa izatea; udalaren gastuak murriztea eta langileen eskubideak errespetatzea”. Ondorioz, Urmendi Eusko Jaurlaritzaren Haurreskolen Partzuergoan integratzeko tramiteak abiatzea eskatu zuten.
Horren aurrean, ordea, EH Bilduko zinegotziek mozioaren kontra bozkatu zuten, eta proposamena “harriduraz” jaso zutela nabarmendu zuen Mendiburuk. “Askotan hitz egin dugu Urmendiren proiektuaz eta 30 urte hauetan beti adostasunez hartu ditugu erabakiak. Urmendi zerbitzu publiko bat da, doakoa, kalitatezkoa eta oiartzuarrek bereziki estimatzen dutena. Balore asko ditu gure haur eskolak eta bereziki azpimarratu nahi genuke, batetik, Oiartzungo haur eskolan haurren 0-3 urteko etapa errespetatzen dela eta, hortaz, bi urteko haurrek aukera dutela haur eskolan jarraitzeko. Gainera, azpimarratzekoa da bertako hezitzaileek egiten duten lana euskara transmititzeko, herriko ohiturak beraien jardunean txertatzeko, haurren zuzeneko jarraipena egiteko etab. luze bat. Badakigu Eusko Jaurlaritzak diru laguntzak kenduko dituela eta Haurreskolak Partzuergoan sartzea ez da aukera bakarra. Bide desberdinak lantzen ari gara, baina Urmendik proiektu oso sendoa du eta guk horren defentsa egingo dugu ahalik eta denbora gehien”.
Zehaztu dutenez, martxoko protokolo gastuak. 310,89 euro izan ziren garaikur eta bidaietan.
