Lesoinu eta 'Artea' asteburuan
Lesoinuren barruko hiru ekitaldi izango dira ostiral eta larunbat artean. Igandean, antzerkia Gezala Auditoriumean.
'Hegoak' ikuskizunaren artxiboko irudia.Kulunka Teatro Oparo dator, berriz ere, Lezoko kultur asteburua. Lesoinuren barruko hiru ekitaldi izango dira, eta gainera, Gezala Auditoriumak antzezlan entzutetsua jasoko du igandean, Artea.
Asteburuko, edo horren atariko lehen ekitaldia bihar (ostirala) jasoko du Gezala Auditoriumak. 10:30ean, Tomas Garbizu Musika Eskolako ikasleek ipuin musikatua eskainiko diete herriko ikastetxeetako haurrei. Asteak daramate musika eskolakoek ikuskizuna lantzen, eta arras erakargarri egingo zaie hezkuntza zentroetako ikasleei ziur, haiek ere musikara hurbil daitezen era atsegin eta ludikoan.
Bihar (ostirala), musika-antzerki ikuskizuna Gezalan, Hegoak antzerki musikalarekin (19:30), Kulunka Teatro konpainiarena. Euskal kantugintzan oso ezagun diren kantak landuko dituzte Garbiñe Insausti aktore eta abeslariak, Iñaki Salvador pianistak, eta Maider Zapirain biolontxelo jotzaileak, baina munduko kantu ezagunak ere ekarriko dituzte aretoko oholtzara. Lesoinuko ordainpeko ekitaldi bakarra da Hegoak, 8 euroko prezioa dute sarrerek, baina jada agortu egin dira.
Larunbatena, berriz, Lesoinuren barruko kantu jira bereziak herriko kaleak euskal kantuz alaitzeari ekingo dio, 12:15ean hasita, Aiton Amonen Bordatik.
Asteburuko azken ekitaldia igandean izango da, 19:30ean Gezalan. Txalo konpainiako Ramon Agirre, Joseba Apaolaza eta Asier Hormaza aktoreek hiru lagunen arteko komedia ekarriko dute Lezora. Sarrerak 8 euroko prezioa du.
