Lizeoko patioa eraldatu dute, auzolanean
Iragan larunbatean Pasaia-Lezo Lizeoko komunitatea osatzen dutenek Antxoko ikastolako patioa eraldatzeko auzolan eguna egin zuten. Antolatzaileak pozik dira izandako harreragatik.
Auzolanean bildu zirenen talde argazkia.Unai Huizi Iragan larunbatean Pasaia-Lezo Lizeoko komunitatea osatzen dutenek Antxoko ikastolako patioa eraldatzeko auzolan eguna egin zuten. Ikastolako kide askok patioak eraldaketa bat behar zuela ikusi zutela aitortu du Tania Trezet gurasoak. Ikastolako patioa publikoa da, eta klase orduetatik kanpo herriari irekita dago. Gune horretan segurtasun falta sumatu eta zikinkeria aurkitu dutela onartu du Trezetek. Hori dela eta, gurasoek argi dute gunea haurren beharretara egokitu behar dela. Egoera horri irtenbide bat emateko, eta ikusita beren kabuz zer egin zezaketen, auzolan eguna egin zuten ikastolako patioan.
Eguna “ikaragarria” izan zela adierazi du Trezetek, jende eta familia mordoa gerturatu baitziren laguntzeko prest. Irakasle edota ikasleak ere bertan izan ziren. “Lan handia dago atzetik, eta larunbatean egindako lan horren fruituak jaso genituen, denak zentzua hartu du, merezi du esfortzuak. Espektatiba guztiak gainditu genituen, familia asko elkartu baikinen. Bakoitzak asko eman zuen elkarlanean aritzeko, denak helburu berarekin. Giro ezin hobea sortu zen, ilusioa eta gogoa nabarmenak ziren. Oso pozik gaude, asimilatzen ari gara oraindik. Ez genuen horrelako parte hartzea espero”, jakinarazi du Trezetek.
Auzolana haurren eskubideak aldarrikatzeko baliatu dutela aitortu du Trezetek, eta ziur da asmo horrek indarrez bete dituela elkartu eta denak batera norabide berean aritzeko. Horrez gain, komunitateko kideen arteko harremanak sendotu dituztela zehaztu du, eta elkarlana “oso positiboki” baloratu dute bertaratu zirenek.
Aurrez aipatu bezala, Antxoko patio hori publikoa da; hortaz, herriko haur guztiek erabil dezakete espazioa. Hori dela eta, “herrigintzari” ekarpena egin diotela ziur dira, ez soilik Lizeoari: “Egin duguna ez da soilik ikastolako haurrentzako izan, egin duguna herrigintza da. Ikastolak eta ikastolako familiek herriari zerbait eman diogu. Antxon espazio falta dago haurrentzat, eta ikusita ikastolako patioa klase ordutegietatik kanpo herrira zabalduta dagoela, denek dute espazio hori eskura. Ikastola ez da onura izango duen bakarra”.
Sustatzaileek goizeko egitaraua prestatu zuten. Hasteko, margotze lanak eta haurrentzako jolasak egin zituzten. Bukatzeko, txokolatada eta familia argazkia atera zituzten, eta denak batera kalejiran herriari buelta eman zioten. Larunbateko auzolanean gurasoek herriarekiko eta ikastolarekiko duten konpromisoa agerian geratu zela nabarmendu du Trezetek. Horrez gain, gurasoen parte hartzea balioan jarri du: “Gurasoen partaidetza denborarekin galdu egin da, eta hori berreskuratzea garrantzitsua da. Guk argi dugu gurasook asko dugula egiteko”.
Hauexek dira dituzten aldarrikapenak:
Patioaren segurtasuna bermatu:
-
Ikastola orduetan erabilera ikasleena bakarrik izatea.
-
Garbiketa aurreratu eta sakonagoa izatea.
-
Segurtasun gehiago, batez ere, asteburu eta jaiegunetan, gauean.
Erabilera anitzeko patioa izatea:
-
Erakargarria izatea umeen aisialdirako, bai ikastola orduetan eta baita ordutegi horretatik kanpo ere.
-
Berdintasunerako eremua izatea: futbolaz gain, joko eta aisialdirako aukera desberdinak ematea.
- Eremua zaintzeko beharrean kontzientzia zabaldu antxotarren artean.
Jarraian, larunbateko auzolanaren hainbat irudi, ikastolak HITZAra bidalitakoak. Unai Huizik egindakoak dira.
