Iratxoak Oiartzunen?
Oiartzungo basoan tamaina txikiko etxolak agertu dira, baina inork ez daki nork egin dituen ezta non dauden ere, ikusi dituenak salbu.
Badira aste batzuk Oiartzungo zenbait txokotan eskuz egindako etxe txiki batzuk agertu zirela: leku batean bat, beste batean beste bat… Eta hirugarren etxola bat ere agertu da berriki herrian. Bizilagun batek HITZAri helarazi dizkio irudiak, baina ez du zehaztu nahi izan non ateratako argazkiak diren magia ez haustearren.
Tamaina txikiko eraikinak dira, iratxoek egiteko modukoak, eta Oiartzungo basoetan barrena daude. Inork ez daki nork egin dituen, herritarren batek, ondoko herriko norbaitek… Iratxoek, akaso? Irudietan ikusten den moduan, mimo handiz egindako lanak dira: detaileak nonahi, kolorearen erabilera, material ezberdinen erabilera…
Etxe magiko horiek ez dira oso agerikoak; basoetako zuhaitzetan eta harroketan baitaude, baina ikusten dituen orori irribarre bat ateratzen diete.
