Aste Santuan ere, Aiako Harriko altxorren bila
Arditurri parketxeak eskaintza berezia antolatu du datozen egunetarako. Ohiko bisitez gain, irteera eta txango ederrak izango dira.
Aste Santu honetan ez da oso urrutira joan beharko, Aiako Harria natur parkeaz gozatzeko eskaintza berezia antolatu baitu Arditurri parketxeak. Meategira egiten dituzten ohiko bisitez gain, txango eta irteera eder bezain interesgarriak izango dira datozen egunetan, haur, gazte eta gazte izandakoei begirakoak.
Lehenik eta behin, ostegun honetan (hilak 17) Mineralen bila izeneko ibilaldi gidatua eskainiko diete herritarrek, euskaraz zein gaztelaniaz. 6 euro ordaindu beharko dira (12 urte beherakoek 4 euro).
Hilaren 19 eta 21ean, aldiz, Iparra galdu gabe izeneko orientazio jolasean parte hartu ahal izango da familian. Natur parkeko eremuan barrena ibiliko dira, ustiatu ziren mineralen eta meategien arrastoak gertutik ikusteko. 10:30ean abiatuko dira txangolariak, eta opariak izango direla iragarri dute. Txango honetarako 5 euro ordaindu beharko dira (12 urtetik beherakoek 3 euro). Ibilaldi erraza izango dela iragarri dute parketxekoek, nornahik egiteko modukoa.
Hilaren 26an biribilduko dute Aste Santuko eskaintza, Sai arreak amildegiaren ertzean izeneko irteera gidatuarekin. Aiako Harrian habiak egiten dituzten hegazti sarraskijale hauen bizimodua eta ohiturak hobeto ezagutzeko aukera izango dute partaideek, hauek teleskopioz behatzeko aukera izango da. 10:30ean abiatuko dira herritarrak, eta 6 euro ordaindu beharko dituzte (12 urtetik beherakoek 4 euro).
Bide batez, gogoarazi dute parketxea bera eta meategia Aste Santu eta Pazko Aste guztian izango dela zabalik, 10:00etatik 14:00etara. Hilaren 22an (asteartea da) itxiko dute.
Informazio gehiago eta erreserbak egiteko, 943 49 42 48 edo 688 89 50 68 telefono zenbakietara hots egin beharko da.
