Udal tabernak kudeatzeko hautagaitzak aurkez daitezke
Antxoko Ibaiondoko kantina eta Trintxerpeko eta San Pedroko jubilatuen etxeetako tabernak kudeatzeko proposamenak jasotzeko epea irekita dago.
Antxoko Ibaiondoko kantina eta Trintxerpeko eta San Pedroko jubilatuen etxeetako tabernak kudeatzeko proposamenak jasotzeko epea irekita dagoela jakinarazi du Pasaiako Udalak. Aurkeztu beharreko agirien eta bete beharreko baldintzen informazio zehatza udalaren kontratazioaren profilean kontsulta daitekeela baietsi du udal erakundeak. Hala ere, hona hemen kontratu bakoitzaren xehetasunak:
Antxoko Ibaiondoko kantina
Gune horren helburua da ostalaritza zerbitzua ematea instalazioko tabernan eta frontoiaren erabilerari lotutako kirol kudeaketa egitea. Hortaz, instalazioen eta elementuen garbiketa eta mantentze lanak egin beharko dira: kantinarenak, frontoiarenak, terrazarenak eta komun autogarbigarriarenak. Bizikleten alokairuaren kudeaketa ere esleipenaren barruan dagoela adierazi du udalak.
Ibaiondoko kontratuak urtebeteko iraupena izango du, eta urtero luzatu ahal izango da, beste hiru urte bete arte; hau da, lau urte guztira. Esleipendunak hilabeteko kanona ordaindu beharko du, eta, zenbateko hori 433,33 eurokoa izango da hilero gutxienez (358,13 euro gehi BEZari dagozkion 75,2 euro), betiere lizitatzaileak eskaintza hobetzen ez badu.
Eskaintzak aurkezteko epea hilaren 28an (astelehena) bukatuko da, 23:59an.
Trintxerpeko jubilatuen etxeko taberna
Eremu horren helburua da taberna zerbitzuaren ustiapenaz arduratzea. Zeregin horien barruan daude: taberna eta sukalde zerbitzua, instalazio eta tresnen garbiketa eta jubilatuen etxearen atezaintza zerbitzua.
Trintxerpeko kontratuak urtebeteko iraupena izango du, eta urtero luzatu ahal izango da, beste hiru urte bete arte; hau da, lau urte guztira. Esleipendunak hilabeteko kanona ordaindu beharko du, eta, gutxienez, euro batekoa izango da hilero (kanon horri ez zaio BEZa aplikatuko), betiere lizitatzaileak eskaintza hobetzen ez badu.
Eskaintzak aurkezteko epea maiatzaren 5ean (astelehena) bukatuko da, 23:59an.
San Pedroko jubilatuen etxeko taberna
Gune horrek edaritegi zerbitzuren ustiapenak hartzen ditu barne: edaritegi zerbitzua, instalazio eta tresnen garbiketa eta jubilatuen etxearen atezaintza zerbitzua.
San Pedroko kontratuak urtebeteko iraupena izango du, eta urtero luzatu ahal izango da, beste hiru urte bete arte; hau da, lau urte guztira. Esleipendunak hilabeteko kanona ordaindu beharko du, eta, gutxienez, euro batekoa izango da hilero (kanon horri ez zaio BEZa aplikatuko), betiere lizitatzaileak eskaintza hobetzen ez badu.
Eskaintzak aurkezteko epea maiatzaren 5ean (astelehena) bukatuko da, 23:59an.
Kontratazio prozeduraren inguruko edo kontratuen baldintzen inguruko zalantzetarako, udalak helbide elektronikoa eta 943 34 40 34 telefono zenbakia ahalbidetu ditu.
