Azkuene Goian herri baratze publikoak sortuko ditu udalak
Jarduketak maiatzean hasiko dira, eta horien helburua da Trintxerpeko gunearen izaera naturala eta irekia berreskuratzea eta 60 herri baratze publiko inguru sortzea.
Maiatzean Trintxerpeko Azkuene Goia parkearen ekialdeko gunea biziberritzeko lanak hasiko ditu Pasaiako Udalak. Jarduketa horien helburua da gune horren izaera naturala eta irekia berreskuratzea eta 60 herri baratze publiko inguru sortzea. Maiatzean abiatuko diren lanak 2018an onartutako Azkuene Goia eremuko urbanizazio proiektuaren barruan daude kokatuta.
Trintxerpen garatuko den egitasmoa herritar guztiei dago zuzenduta, autokontsumorako baratze ekologikoak sortu ahal izateko. Honela definitu du proiektua Iraitz Pazos Hirigintza eta Ingurumenerako eta Zerbitzuetako zinegotziak eta Trintxerpeko alkateordeak: “Baratze publikoen sorrera ez da soilik aisialdirako aukera bat; elikadura burujabetzaren aldeko urrats praktikoa da, eta aldi berean, ingurumen naturalarekiko errespetua, komunitatearen kohesioa eta bizikidetza sustatzen ditu”.
Eta jarraitu du, gunearen helburuak azalduz: “Azken urteetan degradatu den eremu bat berreskuratzea, aisialdirako eta nekazaritza jasangarrirako espazio berriak eskaintzea, bide sare irisgarri eta konektatu bat eratzea, eta landaredi autoktonoa eta natur balioa indartzea”.
Azkuene Goiako Baratze Parkearen eremu osoak 39.500 metro koadro inguruko hedadura du, eta proiektua faseka gauzatuko dela jakinarazi du udalak. Maiatzean ‘Ekialdeko baratze eremua’ deritzon eremuan hasiko dira lanean. Gune horrek 10.000 metro koadro inguruko hedadura du, eta garbiketak, lur mugimenduak, baratzeko egiturak, instalakuntza sareak eta birlandaketak egingo dira. Lan horiek 121.500 euroko aurrekontuarekin gauzatuko dira, eta urrian bukatzea aurreikusi du udalak.
Azkuene Goiako obrak
Azkuene Goiako Baratze Parkerako aurreikusitako lanek milioi bat euro inguruko aurrekontua izango dute guztira, fase guztiak kontuan hartuta. Lanen artean, honakoak gauzatuko dituzte Trintxerpeko eremuan:
- Baratze publikoak: Bi baratze gune aurreikusi ditu udalak, 60 baratze ingururekin. Gune bakoitzak erabiltzaileentzako etxolak, aldatzeko takila komunitarioak, simaurra pilatzeko konpostatze guneak, ur hargune kolektiboak eta atsedenguneak izango ditu.
- Ibilbide eta sarbideen egitura: Egun dauden ibilbideak egituratu eta horien arteko konexioa hobetuko da. Ibilbide nagusi bat Larrebidetik hasiko da, eta hiru sarbide nagusi izango ditu, panel informatiboekin: Larrebide, Mendiola eta Azkuene Goia.
- Aisialdi aktiborako ingurunea: Haurrentzako elementu naturalekin osatutako jolas gune bat eta adinekoentzako espazioak sortuko dira, baita paseorako bide berriak ere.
- Landaredia indartzea: Ingurunearen balio naturala indartuko da, egun dauden hainbat espezie ale babestuz eta eremuko landaredia indartuz.
- Ur edangarriaren instalakuntza: Baratzeak hornitzeko ur puntuak eta edateko uraren sare bat sortuko dira, hiru iturri eta bederatzi punturekin.
Baratzen esleipen prozesua obrak bukatu ondoren erabakiko da, eta udalak prestakuntza eta informazio saioak eskainiko dizkie interesdunei. “Proiektu hau Azkuene Goia eremua biziberritzeko eta herritar guztiei irekitzeko urrats garrantzitsua izango da. Herritarrekin elkarlanean jardutea aurreikusten dugu, belaunaldi arteko harremanak sustatuz eta elikadura osasuntsu eta jasangarriaren balioak sendotuz. Udalak proiektu honi ikuspegi integrala emango dio, aisialdi edo kontsumo soilaren ikuspegitik harago, komunitatea, zaintza eta autogestioa ardatz dituen bizipen gisa”, adierazi du Pazosek.
