Fanderiako Errotaren eskaintza zabala, maiatzean
Hainbat bisita gidatu antolatu dituzte maiatzerako Fanderiako Errotan. Pirinioetako Burdinaren Bidearen Egunarekin hasiko dute hilabetea, eta Gipuzkoako Erroten Egunarekin bukatu.
Pirinioetako Burdinaren Bidearen Eguna ospatuz hasiko du Fanderiako Errotako Ibaiaren Etxeak maiatzeko egitaraua. Horretarako, bisita gidatua antolatu dute maiatzaren 4an, 11:00etatik 12:30ra. Europar Kontseiluak antolatzen du eguna, eta Euskal Herrikoez gain, Andorra, Frantzia eta Herrialde Katalanetako burdinari lotutako kultur zentroak ere biltzen ditu sare honek.
Maiatzeko bigarren asteburuan jarraituko du egitarauak, maiatzaren 10 eta 11n. Ohi bezala, bigarren asteburua izanik, errota 10:30etik 14:00etara irekia egongo da. Errotaren “historia ezagutzeko, martxan ikusteko” eta errota mugitzerakoan ibaiaren garrantzia ezagutzeko aukera izango da.
Gipuzkoako Erroten Egunarekin itxiko dute maiatzeko egitaraua. Gipuzkoako beste errota batzuetan egingo duten bezala, Fanderian ere bisita gidatuak egingo dituzte. Euskarazko bi bisita egongo dira, 10:30 eta 12:30ean abiatuak; eta gaztelerazko bat, 11:30ean.
Bisita gidatuetan izena emateko eta informazio gehiago eskuratzeko turismoa@oarsoaldea.eus edo galemysfanderia@gmail.com helbideetara idatzi, edo 943 494 521 edo 690720 264 zenbakietara deitu behar da.
