Mineralak ezagutzeko aukera izango da larunbatean, Arditurrin
Aste Santurako programatutako ekintzetako bat zen ibilaldi gidatua, baina eguraldiaren ondorioz bertan behera utzi zuten.
Aste Santurako zenbait ekintza programatu zituen Arditurri parketxeak; baina, eguraldi txarraren eraginez bertan behera utzi behar izan zituzten. Hala ere, amorerik ez eman eta ekintzei beste aukera bat ematea erabaki dute, eta maiatzaren 3an izango da horietan lehena: Mineralen bila ibilaldi gidatua.
Arditurri inguruan egingo dute ekintza, eta parte hartzen dutenek mineralak bilatu eta ezagutuko dituzte, jardueraren helburua meatzaritzak utzitako aztarnak ikustea eta ustiatutako mineralak topatzea baita. Era berean, jakinarazi dute aurkitutako mineralak bertan utzi behar direla.
10:00etan hasiko dute ibilbidea Arditurri parketxetik, eta 12:00etarako itzuliko dira leku berera. Euskaraz izango da saioa, eta izena eman behar da aldez aurretik mezu bat idatzita edota 943 49 42 48 zein 688 89 50 68 zenbakietara deituta.
Haurrek lau euro ordaindu beharko dute; hamabi urtetik gorakoek, berriz, sei euro.
