Askotariko arteak bizitzeko aukera esku-eskura
Plaza eskaera egiteko epea zabalduko du Herri Arte Eskolak maiatzaren 1etik 10era bitartean. Behin plaza esleituta, matrikula egin beharko da.
Ralla, Pikabea eta Zorzano gaurko agerraldian. Datorren ikasturterako plaza eskaera egiteko epea zabalduko du Herri Arte Eskolak maiatzaren 1etik 10era. Hori horrela, bost diziplina eta horien barruko 50etik gora ikasgai izango dituzte eskura 8 urtetik gorako herritarrek. Antzerkia, Arte Plastikoa-Ikusizkoak, Dantza, Hitza eta Musika dira bost diziplina horiek. Gaur aurkeztu dute plaza eskaeraren epe irekiera Aitor Zorzano Herri Arte Eskolako presidenteak, Beñat Ralla koordinatzaile pedagogikoak eta Leire Pikabea ikasketa buruak.
Azpimarratu dute, maiatzaren 1etik 10erakoa plaza eskaera dela, eta hortaz, behin plaza esleituta matrikula egin beharko dutela plaza eskatzaileek. Matrikula onarpen hori, ekainaren 1etik aurrera egin behar da. Mugarik gabeko bidea, hori da Herri Arte Eskolak ikasturte berrian erabiliko duen leloa Zorzanok jakinarazi duenez, eta nabarmen jarri du adin ezberdinetako herritarrek arte diziplina ezberdinak probatu, ikusi, ikasi eta garatzeko aukera izatea nahi dutela.
Informazio guztia Herri Arte Eskolaren web orrian kontsulta daiteke. Azken horri ere egin dio erreferentzia Zorzanok, “berritu egin dugu eta askoz ere argiagoa da orain. Plaza eskaera web orriaren bidez egin behar da”.
Herri Arte Eskolaren ibilbideari egin dio aipamena Rallak. Izan ere, 2025-2026a bosgarren ikasturtea izango da Herri Arte Eskola gisa, “izen eta izan berri honekin duela bost urte hasitako bidea pixkanaka kontsolidatzen ari da zabaldu diren diziplina berrietan eta ondorioz, bost diziplinatan bidea urratzeko aukera dago”. Bost diziplinen barruko 50 ikastaroetatik aparte, Hastapen Artistiko Multidiziplinarra ere eskaintzen duela eskolak esan du Rallak, “4 eta 7 urte arteko haurrei artean murgildu eta diziplina eta aukera aniztasuna bereganatu eta lehen pausoak ematea ahalbidetzen die”. Koordinatzaile pedagogikoak azaldu du lehen bi urteetan musika eta gorputz adierazpena lantzen dutela eta ondoko bi urteetan ahotsa-antzerkia eta arte plastiko-ikusizkoak, “astero diziplinarteko murgiltze aberats bat egiten dute. Gainera, gorputz adierazpenean gerora ikasgai dauden dantza diziplina guztiak probarazten dira”.
Berrikuntza baten berri ere eman du: Hastapen Artistiko Multidiziplinarra helduentzat ere zabalduko dute ikasturte berrian lehen aldiz, “horrela, arte diziplina ezberdinekin lehen kontaktua izan nahi duten helduek saio labur baino dinamikoetan arte diziplina ezberdinak deskubritu eta horien oinarria landuko dute”. Osagai garrantzitsua izango dela gaineratu du berrikuntza aldetik. Gainera 4-7 urteko ikasleen gurasoentzat biribila litzatekeela ere esan du, ordutegi berean egingo baitute.
Ikasturte berrian eskaintza “kontsolidatu” egingo da haren hitzetan.
Ate irekien saioak
Herri Arte Eskola eta bertan ari diren irakasleak bertatik bertara ezagutzeko aukera emango dute ate irekien jardunaldien bidez. Maiatzaren 5etik 9ra izango dira horiek eta parte hartu ahal izateko izena eman behar da aurretik web orriaren bidez. Ordutegiak ere bertan kontsultatu ahalko dira (klik hemen). Posta elektroniko bat ere jarri dute eskura zalantzak argitzeko (Klik hemen)
Matrikula tasez ere hitz egin du Zorzanok agerraldi bukaeran, eta gogorarazi du progresibitatea ezarriko dela horietan, “norberaren gaitasun ekonomikoaren arabera”. Horretarako eskaera egin beharko da matrikula proposamena behin onartuta, uztailaren 7ra arteko epea izango da horretarako.
