Euskal Ligako txapeldun izateko bidean
Areto futboleko euskal ligan dago Oiartzun K.E., eta txapeldun izateko lehen aukera dauka igande honetan. Taldea animatzeko autobusa antolatu dute.
Oiartzun K.E. areto futboleko taldeak hitzordu garrantzitsua du igande honetan –maitzak 4–. Iaz igo zen taldea euskal ligara, eta datozen bi asteetan euskal ligaren txapeldun bihurtu eta mailaz igotzeko aukera dute. Gaur gaurkoz, sailkapeneko lehen postuan daude 53 punturekin, eta bigarren taldeari lau puntu ateratzen dizkie.
Liga amaitzeko bi partida geratzen dira, eta igande honetan bigarren taldearen aurka, Otxatarbe taldearen aurka jokatuko dute Bilbon. Partida irabazi edo berdintzen badute, lehengo postuan geratuko dira; haatik, galdu ezkero, hilaren 10ean izango lukete irabazteko aukera, etxean. Kategoriaz lehen bi postuetako taldeak igoko direnez, bigarren geratuta ere igoko lirateke mailaz.
“Isilpean egiten ari diren lan hori argitara” atera nahi dute, eta herritarrak taldea animatzera joateko doaneko autobus bat antolatu dute. 10:30ean irtengo da autobusa, eta partida 13:00etan izango da Txurdinaga kiroldegian.
Autobusean joan nahi duen orok jokalari edo taldeko teknikarien bidez eman beharko du izena.
