Orereta Ikastolako udalekuetan izena emateko epea zabalik da
2-12 urte arteko haurrei begirakoak dira, eta maiatzaren 13ra bitartean eman daiteke izena.
Orereta Ikastolako Udalekuak. Udalekuetan parte hartzeko izena emateko epea zabaldu du Orereta Ikastolak. 2-12 urte arteko haurrei begirakoak dira, eta maiatzaren 13ra bitartean eman daiteke izena. Ekainaren 23an hasi eta uztailaren 18an bukatuko dira. Bi urteko haurrak Esmalteriako ikastolaren egoitzan ariko dira, HH3tik LH3ra artekoak Añabitartean; eta zaharrenak, berriz, Linoko (Agirre Lehendakaria) egoitzan.
Udalekuak parte hartu nahi duten familia guztiei irekiak dira.
Haurren adinaren arabera, hiru eskaintza dira: Udatxiki, Eman Hegoak eta Udaktiboa. Lehenean, begiraleak hezitzaileak dira, Haur Hezkuntzako ikasketak dituzte. Bigarrena, HH3 eta LH3 arteko ikasleei begirakoan, mendialdean izango dira haurrak, Añabitarten, eta irteera eta txangoak ere egingo dituzte. Udaktiboak, helduenak batuko ditu eta kirol ekintza eta irteera anitzak egingo dituzte.
Ikastolak nabarmendu duenez, aisialdirako aukera euskalduna eskaini eta hezkuntza formalaren osagarri izatea dute helburu udalekuek, “haurren behar, nahi, jakin min, gustu eta erritmotik abiatuta aritzen gara lanean”.
Bi urteko haurrentzako udaleku eskaintza bakarra dela Orereta Ikastolarena Errenteria-Oreretan ere nabarmendu dute.
Informazio gehiago eta izena emateko, egin klik hemen.
