Maiatza ekintzaz bete dute lau barrutietako haur eta nerabeek
Eskubidean planaren barruan, ekintza sorta interesgarria antolatu dute datozen asteetarako herriko DBHko ikasleek, udalarekin elkarlanean.
Pasaia-Lezo Lizeoan egin dute gaurko agerraldia. Pasaiako lau barrutietako haur eta nerabeek, udalarekin elkarlanean, ekintza sorta interesgarria antolatu dute datozen egun eta asteetarako. Eskubidean planaren barruan, haur eta nerabeei “babesa, tratu ona eta parte hartzeko aukera” emateko lanean jarraitzen du erakundeak, honen asmoa baita, “beraien eskubideak bermatzen dituen herria izatea”. Donibaneko Pasaia-Lezo Lizeoan izan da gaurko agerraldia.
Bide horretan, zenbait antolatu dituzte DBH 1,2,3 eta 4. mailako haurrek azken hiletako lanketaren ondoren, herria hobetzeko proposamen zerrenda bat aurkeztu dute gaur.
Teo Alberro alkatea gaurko agerraldian izan da, eta Eskubidean planaren garrantziaz aritu da: “Eskubidean funtsezko tresna da Pasaiako Udalarentzat, haur eta nerabeen ahotsa, nahiak eta eskaerak udal politiketan txertatzeko bide zuzena baita. Ekimen honen bidez beste behin argi gelditu da euren nahiak adierazteaz harago, horiek egi bihurtzeko ardura eta konpromisoa ere badutela gazteek, eta antolatzeko ahalmena ere bai”, esan du. Adingabeen eskura behar dituzten baliabideak jartzeko konpromisoa agertu du alkateak, “eta bidelagun izaten behar dutenerako”.
Joan den apirilaren 12an ekin zioten egitarau honi, Antxon egindako skate tailerrarekin. Jarraian, egitarau osoa:
- Hilak 10 (larunbata da): Kale garbiketa egingo dute auzolanean, San Pedron. 11:00etan pilotalekuan elkartuko dira.
- Hilak 11 (igandea da): Multiabentura eguna egingo dute San Pedroko pilotalekuan, 17:00etatik 19:30era.
- Hilak 18 (igandea da): Antxoko Biteri plaza atontzeko auzolana egingo dute 11:00etatik aurrera.
- Hilak 24 (larunbata da): 12-17 urte artekoen Gazte olinpiadak jokatuko dituzte Donibanen, 17:00etatik aurrera.
- Hilak 31 (larunbata da): Donibane txukundu eta garbitzeko auzolana egingo dute 17:00etatik aurrera. Bizkaia plazan jarri dute hitzordua.
