Euskaraldiarekin bat egin du Errenteriako Udalak
Adierazpen instituzionala egin dute Errenteriako Udala osatzen duten talde politikoek, Euskaraldiarekin bat eginez eta hura sustatzeko konpromisoa hartuz.
euskaraldiaren harira adierazpen instituzionala egin du Errenteriako Udalak.Izaro Perez Loperena Euskaraldiaren harira adierazpen instituzionala egin dute Errenteriako Udala osatzen duten talde politikoek. Adierazpenean, aurten ariketa sozial horretan parte hartuko duten entitate eta norbanakoei gonbidapen gehigarria helarazi die Errenteriako Udalak: “Beren egunerokoan edo jardunean euskararen erabilera areagotzeko urrats esanguratsuak eman ditzatela, lehen hitza euskaraz eginez, elkarrizketa elebidunak ahalbideratuz; azken abtean, euskaraz dakienarekin euskaraz eginez”.
Gonbidapen horren helburua inertzia linguistikoetan aldaketa praktikoak lortzea dela azaldu du udalak adierazpen instituzionalean. Hori horrela partaide bakoitzak bere buruari euskararen erabilera areagotzeko zein urrats eman dezakeen pentsatu eta Euskaraldiak irauten duen hamaika egunetan urrats hori gauzatu eta jakinaraztea nahi du. Udalak eman du horren berri eta azaldu du Euskaraldia babesten duela eta herri gisa hartuko duela parte ariketan. Gizartean eta herrian Euskaraldia sustatzeko konpromisoa hartu du halaber, ariketarekiko atxikimendu publikoa erakutsita.
Euskararen alde urrats esanguratsuak emango dituztela udalean ere esan dute talde politikoek adierazpen horretan, eta ikusarazi egingo dituela urrats horiek. Azkenik herritar eta entitateei Euskaraldian izena eman eta parte hartzeko gonbita egin die (klik hemen).
Hemen klik egin adierazpen instituzionala hitzez hitz irakurtzeko.
