Herritarren babesa eskatu du Areto Futboleko Oiartzun K.E. taldeak
Euskal Ligako txapeldun izateko azken aukera izango du hilaren 10ean –larunbata– Oiartzun K.E-k. Herritarrak partidara deitu dituzte.
Areto Futboleko Oiartzun K.E. taldeak larunbat honetan –hilak 10– izango du Euskal Ligako txapeldun izateko azken aukera. Pasa den astean Otxatarbe taldearen aurka jokatu zuten Bilbon, eta 7 – 4 galdu bazuten ere, estatuko hirugarren mailara igo dira matematikoki. Igoera hori 3., 4. eta 5. postuetako taldeek pasa den asteko emaitzek ahalbidetu die. Alabaina, larunbat honetako partida irabazi behar dute Euskal Ligako txapeldun izateko.
Gaur gaurkoz, Oiartzungo taldeak lehenengo postuan jarraitzen du, bigarrenarengandik puntu batetara.
Hilaren 10ean sailkapenean azken aurreko postuan dagoen Leioa Irabaki Zierbena taldearen aurka jokatuko dute, eta “partida horiek oso arriskutsuak” izaten direla azaldu dute, “tranpa” izaten baitira “askotan”. “Mailaz jaisten diren talde horiek burua tente dutela amaitu nahi izaten dute, irabazi egin beharko dugu beraz”, amaitu du Jokin Oiarbidek.
Gauzak horrela, areto futboleko taldeak herritarrak, jokalarien lagunak, familia… denak deitu dituzte 18:00etan Elorsoro kiroldegian izango den partidara.
Era berean, Miren Taberna OKE B taldea playoffetarako sailkatu da aurreko astean Eskoriatzari 3 – 4 gailenduta.
